Segun rapport di Amnesty International:
ORANJESTAD (AAN): Segun un estudio recien cu a wordo publica siman pasa door di Amnesty International, e refugiadonan Venezolano na Aruba ta victima di falta di leynan specifico pa refugio riba e isla.
A organisacion ta indica cu e crisis post-electoral na Venezuela ta demostra e urgencia y necesidad di leynan pa refugio cu por proteha e Venezolanonan cu ta huy for di e crisis di derecho humano den nan pais y cu por garantisa nan derecho humano ora nan yega Aruba.
Aruba ta solamente 24 kilometer for di Venezuela, y hopi Venezolano ta yega Aruba na un manera iregular pa medio di transportenan maritimo peligroso. Nan ta wordo deteni automaticamente ora nan yega y ta keda deporta.
Esaki ta un di e conclusionnan di e ultimo raport di investigacion di Amnesty International, titula “Sin Proteccion – Desvelando brechanan den e proteccion di Venezolano na Aruba”. E rapport ta resalta e falta di leynan specifico pa refugio na Aruba, e problema relaciona cu detencion di solicitantenan di refugio, y preocupacionnan tocante e trato na e Venezolanonan, incluyendo mucha chikito.
E rapport aki ta e prome investigacion di Amnesty International tocante e solicitantenan venezolano di refugio na Aruba.
Solicita refugio na Aruba
Aruba, parti di Reino Hulandes cu un populacion di 107.151 persona, ta un destinacion popular pa Venezolanonan cu ta buscando proteccion for di e crisis den nan pais. Di juni 2023, tabatin un total calcula di 17.000 Venezolano na Aruba.
No tin trafico aereo directo entre Venezuela y Aruba for di 2018, y e Venezolanonan mester cumpli cu exigencianan specifico di visa y tin documentonan necesario pa por drenta Aruba. E documentonan aki ta dificil pa hopi Venezolano haya aworaki, y asina hopi di nan ta yega Aruba pa medio di boto via lama.
E Venezolanonan por solicita refugio na diferente manera na Aruba: ora nan yega na e isla via un entrada regular (legal), mientras nan ta na Aruba, of despues cu nan a wordo deteni den un centro di detencion pa migrante.
“Mientras Amnesty International ta compronde cu e condicionnan ta dificil pa un isla manera Aruba,” Dagmar Oudshoorn, Director di Amnesty International Hulanda a bisa, “Aruba a ratifica un tratado internacional di derecho humano, cu tin cierto derecho y obligacion referente na refugio y solicitantenan di refugio.”
Aruba ta parti di e Convencion di Refugiadonan di 1951 y mester cumpli cu su obligacionnan, manera e principio di non-refoulement, cu ta prohibi e deportacion di hende bek na un pais caminda nan por encontra persecucion, tortura of otro violacion di derecho humano, manera e ta e caso den Venezuela actualmente.
Envolvimento di gobierno Hulandes
“Amnesty International ta contra deportacion di Venezolanonan for di Aruba y tin preocupacion tocante e proteccion di Venezolanonan na Aruba,” Oudshoorn ta bisa. “E organisacion di derecho humano tambe tin preocupacion tocante e envolvimento di gobierno Hulandes den e acomodacion di refugiadonan na Aruba.”
E gobierno Hulandes ta duna sosten financiero y tecnico na Aruba pa e acomodacion di Venezolanonan. E sosten aki a inclui pago pa vuelonan uza pa deportacion di Venezolanonan, lo cual por contradeci e principio di non-refoulement.
Documentonan for di tur dos gobierno ta duna prueba di esaki. E sosten di e gobierno Hulandes a concentr’é mas riba e localisacion di Venezolanonan y nan detencion y deportacion, enbes di nan proteccion.
Detencion forsa di migrante
Venezolanonan cu ta drenta Aruba di manera iregular ta wordo aresta y poni den detencion pa migrante. Ora nan yega, nan ta ricibi un orden di detencion y tur nan Pertenencia personal, manera telefon, ta wordo confisca. Den 72 ora, un hues ta evalua e legalidad di e detencion. Aunke por haya asilo den e centro di detencion, no ta algo cu hende conoce di e posibilidad aki.
Algun Venezolano cu a wordo deteni a indica cu nan a wordo forsa pa firma orden di deportacion. E documentonan ta den idioma Hulandes, lo cual hopi Venezolano no por compronde. Ademas, e condicionnan den e centronan di detencion ta pober. Abogado no tin acceso ilimita na e persona den e centronan, y hende muhenan na estado y personanan cu problema di salud ta wordo cera y deporta. Algun Venezolano a indica cu nan a wordo trata na un manera humiyante y xenofobico.
“Mi a drumi riba tera den un container nuebe dia. Sin awa, luz, paña limpi, habon of skeir'i djente. Nan no a laga mi sali pa haya aire fresco,” a bisa ‘Omar’, cu a wordo deteni.
Sigui lesa mas di e rapport aki den un otro articulo.
