Parlamentario Ricky Hoek (MEP):
ORANJESTAD (AAN): Na un pais democratico, transparencia, husticia, y responsabilidad ta fundamentonan esencial pa garantisa un gobernacion cu ta sirbi e interes di su pueblo.
Segun Parlamentario Ricky Hoek di fraccion di MEP: "E introduccion di e institucion di Ombudsman ta demostra un compromiso firme cu democracia. Ombudsman ta sirbi como un baluarte di husticia y defensa pa e ciudadanonan di Aruba."
Aruba, como parti di su desaroyo politico y democratico, a logra un paso significante pa garantisa e derechonan di su ciudadanonan cu e realisacion di e institucion di Ombudsman. E figura di Ombudsman ta un mecanismo independiente cu su meta principal ta pa defende e interes di e pueblo di keho di trato inhusto den su interaccion cu instancianan gubernamental.
Ley di Ombudsman
E idea di institui un Ombudsman no ta nobo na mundo. Diferente pais a adopta e sistema aki hopi tempo pasa, y hopi hende a puntra: "Pakico a tarda asina hopi pa Aruba tin un institucion manera esaki?". Aki ta caminda partido MEP, bou liderazgo di Parlamentario Edgard Vrolijk, a establece e ley pa Ombudsman den nos sistema. Vrolijk, hunto cu su coleganan, a identifica e necesidad urgente pa e instituto aki na Aruba, un pais chikito unda hopi biaha ta sinti cu e pueblo no tin un instancia cu por defende nan contra e instancia gubernamental.
Oposicion contra Ombudsman
Di un punto di bista politico, no tur partido a duna apoyo na e idea di Ombudsman. Durante e reunion publico riba 23 di januari 2023 den Parlamento, a keda cla cu oposicion no a sinti cu e institucion ta necesario na Aruba. Nan argumento di cu e sistema actual ta suficiente pa regla cualkier tipo di reclamo. Otronan a pensa cu e costo financiero ta un obstaculo, pensando cu e gasto di tal institucion no ta mereci.
Sinembargo, e realidad ta cu hopi hende na Aruba a sinti nan mes impotente den nan lucha pa haya husticia contra gobierno of un ke otro instancia gubernamental. Por ehempel, hende cu keho cu trato di burocracia, tardansa den procesonan gubernamental, of trato inhusto caminda no tabata tin un mecanismo cu por a investiga e situacionnan aki den un manera independiente.
Beneficio pa pueblo
E introduccion di Ombudsman ta cambia e dinamica aki, duna e pueblo di Aruba un bos, un defensa, y mas importante: un paso pa deal cu reclamo na un manera sigur, neutral, y eficiente.
Parlamentario Hoek a agrega: "Nos tin un sistema cu ta duna e pueblo un bos fuerte den e proceso democratico y haya un capa adicional di transparencia y proteccion pa e ciudadanonan."
E Ombudsman no solamente ta beneficia e ciudadanonan individual cu ta haya nan derecho, sino tambe ta fortalece e democracia mes. Transparencia y responsabilidad ta elementonan vital pa un sistema democratico prospera. E Ombudsman ta un horea cu ta tende e pueblo y ta duna recomendacion na e gobierno pa mehora nan procesonan, elimina ineficiencia, y preveni abuso di poder.
Danki na e esfuerzo persistente di MEP y Edgard Vrolijk, Aruba finalmente tin su propio Ombudsman. E impacto di e institucion aki sin duda lo beneficia no solamente e ciudadanonan di awe, pero tambe e generacionnan di mañan. Un palabra di pabien y exito na Sra. Jurima Bryson cu su huramentacion como e prome Ombudsman di pais Aruba, Hoek a finalisa bisando.
