Expo di ‘Lens di mi Wowonan’ yena cu recuerdonan di 60 aña di Telearuba  

ORANJESTAD (AAN): Diabierna anochi a tuma lugar apertura di e 17 edicion di exposicion ‘E Lens di mi Wowonan’, cu ta un showcase di potretnan di ultimo 12 lunanan di prensa en general. 

Esaki a tuma lugar den foyer di Biblioteca Nacional, cu presencia di Prome Ministro Wever-Croes, Ministro Maduro, Ministro Croes, Ministro Arends, y Ministro Wever.

   E expo di e aña aki a wordo patrocina pa RBC Bank, y dedica na e trabao periodistico di Hilario Doncker, tambe videografia di Cornell Dijaoen, y fotografia di Richard Lacle.  E asina yama Premio Djispie Franken a worde otorga e aña aki na Albino Tromp, tecnico di Telearuba.

   E organizador Leo Vrolijk apenas dos luna pasa a sufri e golpi fuerte di perde su yiu muher tragicamente y casi no a organiza e actividad aki.  Pero el a pensa cu su yiu muher lo a desea pa e expo sigui, y pesey mes na ultimo momento a duna su colaboracion.

   Branch Manager Aruba, esta Joanaila Geerman-Lacle a keda encarga pa entrega e plaquette di reconocemento na cada uno.  Despues esnan honra a para hunto y corta e cinta pa inauguracion oficial di e exposicion.

   Relaciona cu e hecho cu Telearuba ta cumpliendo 60 aña di existencia, a dedica como 100 potret pa relata e storia di e planta di TV aki, cu a cuminza na comienzo riba canal 12, pero despues a switch y keda riba canal 13.

   E expo a inclui tambe un seccion extenso di potretnan fenomenal di deporte, for di futbol, windsurfing, te na subimento di Hooiberg.

   DIARIO ta felicita e organizador Leo Vrolijk cu e fenomenal expo aki, cu lo keda habri durante henter luna di September for di 8:00 am pa 5:00 pm na Biblioteca Nacional den Madurostraat na Playa.