Pueblo di Curaçao a drenta accion y a logra interumpi atraco violento den Punda

Atracadornan a haya sla den curpa

WILLEMSTAD: Un Diasabra merdia trankil den capital di e isla di Curaçao, inespera a converti su mes den un escena violento di crimen.  Esey ta ora cu den Breedestraat na Punda, apenas 70 meter leu for di Emmabrug (brug di ponton) dos delincuente a yega riba motorcycle y para net na entrada di Milano Diamond Gallery, cu ta un joyeria hopi exclusivo.

   Nan a drenta e lugar y na forma activo a comete un ‘Hit & Go’ atraco, y violentamente tabata destrui glas di mesanan di showcase paden cu martieu, y cu un Sportbag grandi color preto, tabata yena esaki cu prenda, holoshi y tur cos di balor.  Un silent alarm a wordo activa.

   Mientras tanto publico para pafo den Breedestraat a cuminza ripara kico ta pasando, y nan tambe a yama Polis.  Hopi hende a cuminza expresa nan disgusto cu e criminalnan ta haciendo esaki den bista di turistanan cu tambe ta riba caya.

   Ora cu e atracadornan a sali bek cu nan Sportbag basta pisa cu tur e botin, nan a tarda un poco.  E motorcycle ta uno cu posiblemente ta tarda pa start, y durante cu e duo riba motorcycle ta prepara pa bay, un ciudadano eybanda a cuminza cana nan tras y poco-poco a acerca e delincuentenan cu ainda ta na entrada di e joyeria.

   Net ora cu e motorcycle ta bay move, e ciudadano cu tactica a rek su dos brazanan y a ranca e delincuente sinta mas patras cu sweater blauw y cu tin e Sportbag di botin den su poder.  E homber aki a cay di lomba, y e momentum aki a pone cu e motorcycle a hop y a bolbe paga un tiki.

   E atracador a cuminza haci algun movimento pa purba scapa publico, y tratando pa bolbe hisa e Sportbag pisa riba e motorcycle.  Pero aki ta unda cu ciudadanonan a cuminza zwaai cu piedra, klinker, y mas obheto pisa cu a cuminza dal e criminalnan aki.

   E atracador na blauw bisti, a cuminza haya yobida di piedra riba dje, y dado momento a dicidi pa djis laga tur cos atras y cuminza core pa su bida.  E no a yega leu, pasobra multitud di hende cu hopi balentia a yega riba dje, y apenas 20 meter leu for di e salida di e Milano Diamond Gallery el a bay tera y hendenan a wante masha duro mes ey den Breedestraat.

   Su amigo delincuente, esun cu ta maneha e motorcycle y no por a logra move cu esaki bon mas, a dicidi drenta den Heerenstraat bay direccion panort.  Pero un multitud su tras a yega y gare, y e tambe a wordo wanta.

   Mientras tanto, hopi Curasoleño cu ta fada di mira crimen asina ta socede riba caya, a dicidi na yega cerca y a sigui manda piedra, y cuminza scop e delincuente bisti na blauw cu ta riba acera den Breedestraat.  Aunke e hendenan cu tin e delincuente wanta abao a pidi publico pa bira trankil, asina nan a keda bin y keda manda scop riba dje.  Nan ta fada di delincuencia, y esaki tabata nan chens di yena e curpa di e criminal aki cu golpi.

   Varios hende cu a pasa bay wak e showcase di Milano Diamond Gallery a keda den shock con destrui e lugar a keda.  E dos delincuentenan aki a comete un atraco violento destruyendo monton di mesa special di glas y cu un sportbag grandi color preto tabata keda yena esaki cu mercancia.  Pesey nan a caba di mira e destruccion, y tabata cana bay y warda nan turno pa manda scop den cabez di e criminal abao wanta.  Su cabez a cuminza sangra, wowonan a hincha, y sanger a cuminza sali di nanishi.

    Y tur hende puntrando ta unda Polis ta.  Pa sorpresa di hopi hende, no obstante tantisimo yamada pa e caso grave aki, autoridad policial a tarda un eternidad pa yega y tuma over.  Pa e ora ey ya caba e delincuente den Breedestraat a bira asina suf di e golpinan, cu e no tabata ni resisti mas.

   Cu Ambulans a transporte pa Hospital, aunke a pone su mannan prome den boei.  E motociclista tambe a wordo hiba door di Polis.  Henter atardi y anochi, comunidad di Curaçao a expresa abiertamente nan desapunto cu net un dia asina druk, cu tur Polis, Recherche, y demas funcionario hudicial tabata ausente den Punda.  Bon mes cu comunidad balente a gara e atracadornan aki.