'Explora I' a bishita Aruba pa prome biaha

ORANJESTAD (AAN): Aña 2024 a cuminsa bon pa Aruba Ports Authority N.V. (APA) y a sigui bon tambe durante e di dos siman di luna.

Riba dia 8 di januari 2024 a yama bonbini na “Explora I” di e liña di crucero Explora Journeys” cu a haci su first call den waf di Aruba. Explora I a cuminsa navega dia prome di augustus di aña 2023 desde Dinamarca.

   Tabata un momento historico, pa aprecia un barco nobo nobo un biaha mas, pa scoge Aruba riba su itinerario for di salida caba. E no ta un barco grandi, pero si “high end” cu ta atrae un mercado cu un poder economico mas halto, specificamente e turistanan cu ta exihi mas, pero ta dispuesto pa paga mas tambe pa un biahe di crucero manera esun di Explora Journeys.

   “No ta e prome barco di e tipo aki cu a yega nos isla. Aña pasa tambe nos a ricibi Evrima di e liña Ritz Carlton Yacht Collection, cu a yega nos isla tambe den e prome siman di januari. Nos ta haciendo hopi esfuerzo pa diversifica nos turismo crucero, drentando den tur e diferente segmentonan di e mercado enfocando tambe riba diferente tipo di liñanan di crucero manera di Explora Journeys. Nos meta pa e añanan nos dilanti ta no solamente aumenta cantidad, pero nos ta trahando duro tambe pa sigui eleva e calidad di tur e huespednan cu ta bishita Aruba”, asina Marc Figaroa, CEO di Aruba Ports Authority N.V. a duna di conoce.

   Na ocacion special aki a tuma luga un ceremonia cortico abordo di e crucero. E capitan a intercambia regalo cu e Sr. Figaroa, CEO di APA y a expresa su satisfaccion pa e bunita recepcion cu nan a ricibi na nan yegada na nos isla. Nan ta spera di drenta hopi biaha mas den waf di Oranjestad. Representantenan di Aruba Tourism Authority tambe tabata presente durante e ceremonia cortico abordo di e crucero.