Otmar Oduber, lider di Plataforma Nos Pais:
ORANJESTAD (AAN) – Otmar Oduber, lider di Plataforma Nos Pais, a trece dilanti cu pa loke ta trata hotelnan y e cantidad di camber cu ta den construccion y cu ta e unico actividad economico den e sector aki cu ta tumando lugar, hopi hende no ta corda kico e realidad ta tras di e construccion di hotelnan cu ta den desaroyo na e momentonan aki. El a referi na dos ley importante cu el a bin cu ne durante su periodo como Minister den gobierno di AVP.
“Mi tabata tin e honor di ta casi ocho aña e Minister di Turismo, cu a pone e Oficina di ATA sui generis riba pia, y e minister cu na 2015-2016 a percura pa un ley, unico den henter Caribe caminda cu aworaki otro paisnan ta sigui nos pasonan, por ta hasta a lubida cu tabata e ley pa prohibi benta di hotelnan local pa cu all inclusive, kiermen cu otro cadenanan di all inclusive no por yega Aruba, manera ta pasando na Mexico, Cancun, Santo Domingo, y tur parti di Caribe unda por mira cu a bay den e direccion contrario di Aruba, a base di e determinacion e tempo ey pa pasa un ley, cu por cierto ora mi a abandona partido AVP for di minister, nunca a keda publica apesar cu el a pasa den Parlamento cu mayoria di voto, sino te aña 2017 ora mi a bolbe den e Gabinete Wever-Croes -1 y cu e ley a drenta na vigor na final di 2017”, Oduber a señala.
El a reitera cu, en todo caso, na Aruba un ley a wordo pasa unda no por a permiti mas cantidad di camber all inclusive riba nos isla.
“Y esey tabata un di e cartanan az di nos turismo, pa bisa cu nos ta keda como un destinacion premier, di halto nivel pa sigui ‘cater’ riba e turismo cu no ta pertenece na all inclusive y mas ainda siendo un pais cu ta depende di casi 90% di nos turismo”, Oduber a acentua.
El a sigui bisa cu e mesun ley aki a regula e tempo ey caba, den e ley un aspecto cu tabata birando un problema cu ta e “Airbnb” cu tabata obliga nan pa tin un ley, un permiso di hotel pa e control por tuma lugar, pa gobierno por a cuminza haya su “fair share” di e industria aki cu tabata creciendo.
“Lamentablemente, mucho no a wordo haci riba e tereno aki, sinembargo tur e mecanismonan di control tey pa wordo ehecuta unda cu na e momentonan aki, e industria di Airbnb y loke nos ta yama ‘other accommodations’ ta genera alomenos 30% di e acomodacion aki na Aruba, cu nos por imagina cuanto placa ta pasando pafo di e circulo economico di Aruba, den exterior, placa ta wordo paga cu nunca ta pasa den e economia di Aruba”, Oduber a señala.
