Experimento pa purba pleister muraya di edificio colonial aki usando kalki

Experimento pa purba pleister muraya di edificio colonial aki usando kalki

ORANJESTAD (AAN): E ta un dolor di cabez pa hopi contratista ora di bay renoba edificionan cualnan a wordo construi den tempo colonial riba e isla.  E ta algo cu cada rato na ta topa cune, ora di a renoba e.o. Stadhuis na Playa, Faro di California, Tanki di Awa, y tambe edificio di Contraloria General.  E murayanan ta desaroya un situacion unda e pleister pafo ta kraak, pela, y bo ta mira material blanco ta yega pafo.  Tabata bisto cu cement no ta bay bon cu e murayanan aki traha principalmente di piedra di coral.

   Y esey ta loke un experto internacional cu Stichting Monumentenfonds Aruba a consulta cune, a splica tambe.  Basa riba su informacion, decision a ser tuma na Aruba pa trata na usa un otro sistema ora di bay renoba edificionan bieu riba e isla.  Pero prome cu haci esey, a opta pa renoba djis un pida chikito pa observa y analisa si acaso enberdad e lo ta mihor, y no usa nada di cement riba dje mas.

   Y esaki a cuminza algun siman pasa caba riba e pida di fachada di edificio di Contraloria General na Wilhelminastraat 6.  Despues di a haya fondo pa haci e trabao ey, Monumentenfonds a start cu e experimento.

   Señora Daphne Fernandes-Pedra kende ta Projectleider di Monumentenfonds a splica cu nan a renoba e parti paden completamente, pero e pida pafo nan kier a haci un experimento, awor cu a descubri cu e estilo di renoba cu nan tin costumber di haci, no ta resultado bon, principalmente edificionan traha di piedra di coral. 

   Desde cu a restaura e edificio di Contraloria General (conoci como ‘Algemene Rekenkamer Aruba’) na aña 2007, continuamente e pleister ta habri y verf ta chip y kita.  Esaki tabata pone cu Monumentenfonds tabata haci mas reparacion eynan compara cu normal.

   Monumentenfonds despues a logra haya contacto cu expertonan cu sa con pa traha cu piedranan di coral (‘kalki’) y a busca nan pa bin yuda.  Na aña 2020 e experto a bin pa duna conseho pa cu e trabao di Faro di California, y e Tanki di Awa.

   Cement y Kalki no ta bon: Monumentenfonds a siña cu e union entre cement y piedra di coral (kalki) no ta un bon matrimonio.  Pasobra apesar cu e cement tambe ta traha di limestone (kalki di coral), su propiedadnan ta cambia na momento cu cement ta wordo fabrica, y debi na esey e no ta ‘respira’, y e piedra di kalki na momento cu e muha, e ta absorba hopi humedad, y na momento cu e muha y e no por seca bek, e ta forma salo.  Anto e salo aki ta busca forma pa ‘sali’ di eynan.  Pues e ta habri e pleister di cement, pero na mesun momento e ta come e piedra di kalki tambe.

   Pues e piedra poco-poco ta converti su mes den santo bek, y esey no ta bon den un edificio.  Como cu e structura ta traha di e piedra, y si esaki ta deteriorando, na dado momento bo por haya cu e por basha bin abao.

   Test pa e posible solucion: Pues awor ta kitando tur cement cu a yega di wordo pega riba e piedranan di kalki aki, y na final lo bay pleister esaki bek usando material di kalki, y asina lo pone e pida muraya aki bek den su material original, cu su tipo di verf original tambe.  Unavez cu e keda cla, nan lo bay observa con largo e pida muraya aki lo bay wanta, si acaso e superficie lo bay kraak y pela tambe, y mas.

   “Si nos ripara cu e resultado ta bon, e ora ey nos sa tambe cu otro restauracion di edificionan traha di piedra di coral tambe mester wordo restaura bek cu kalki, envez di cement,” señora Fernandes Pedra a indica.

   E edificionan cu ta basha y traha despues di añanan 1915 of 1920, nan ta un otro storia como cu nan ta traha original mes caba cu beton, pues eseynan si por wordo restaura normal usando cement.

   Monumentenfonds kier pa varios contratista local tuma nota di e experimento aki cu ta wordo haci den Wilhelminastraat.  Nan a hasta informa alumnonan di bouwkunde di Colegio EPI, y nan a acudi cu un excursion pa bay mira loke ta wordo haci, pa asina nan siña di e proceso aki pa nan sa mas di dje den futuro.