Minister Geoffrey Wever:
ORANJESTAD (AAN): Despues di 4 sesion den cual a toca diferente tema con pa maneha bo finansa, un segundo grupo di participante a ricibi nan certificado pa e curso Finansas den mi Hogar. E proyecto Finansas den mi Hogar a wordo organisa door di Minister Geoffrey Wever y desaroya door di Fundacion Plan di Bida.
Un decision pa cumpra of spaar of ambos, tin un impacto riba bo cartera, awe y den futuro. Tur dia nos ta tuma decisionan cu ta afecta nos cartera. Awe bo por fia pa cumpra un wasmachine of realiza e biahe di bo soño pero cu e realidad cu tur luna y pa un periodo defini, un parti di bo budget ta bai pa paga e fiansa.
E debe ta pone un presion extra tur luna riba bo cartera. E situacion lo bira preocupante si bo gastonan ta mas hopi cu bo entrada. Y esaki ta un desaroyo cu un sondeo di Banco Central di Aruba “The Financial Wellbeing Household Survey 2021” ta indica: na Aruba 3 di 10 hogar ta gasta mas di nan entrada tur luna. E desaroyo preocupante aki ta mustra e necesidad di duna mas informacion na con nos por maneha nos cartera na un manera mas consciente.
Pa ciudadanonan cu ta desea pa tuma decisionan financiero na un manera mas consciente e curso Finansas den mi Hogar ta wordo ofreci gratis door di Ministerio di Asuntonan Economico. Finansas den mi Hogar ta un curso di educacion financiero y ta consisti di 4 sesion cu tema manera con pa spaar, kico lo pasa ora no por paga debe mas, e importancia di tin meta den bida y kico ta e distincion entre luho y prioridad segun bo entrada.
E curso lo wordo duna den tur districto. Despues cu e prome grupo a participa na e curso na Paradera, awor tawata e turno pa e dos grupo den districto di San Nicolas ricibi nan certificado.
Minister Geoffrey Wever ta gradici cada ciudadano cu nan participacion, un participacion cu sigur lo contribui na nan desaroyo y bienestar personal.
E siguiente districto ta Oranjestad. Registracion ta completamente gratis, pero cupo ta limita.
