Directora di Santa Rosa, Nathalie Maduro:
ORANJESTAD (AAN) – Nathalie Maduro, directora di Departamento di Agricultura, Cria y Pesca (Santa Rosa), den entrevista cu DIARIO a expresa cu e ta lamenta cu tin hende na Aruba cu no ta coopera y no ta respeta e damnan cu tin rond di e Isla, cu ta asina importante pa yuda e cunukeronan cu awa pa nan plantacion.
Maduro a comenta cu nan por bin cu hopi ley y maneho, pero vigilancia ta keda e problema, pasobra no por sinta hende banda di e damnan 24/7 pa controla.
El a subraya cu ta keda na nos como habitantenan di Aruba, cu mester bira mas conciente y realiza cu na momento cu ta tira sushi asina den e dam, ta bay tin efectonan pa e cunukeronan cu ta uza e awa.
Tin caso cu Santa Rosa a haya asbesto y baterianan di auto tira den e awa di dam y tur esey ta azeta. Na momento cu DVG haci control di awa, y nan ta identifica cierto material of productonan den awa, LVV no por entrega e awa ey mas pa cunukero.
“Na Aruba nos tin otro reto y otro limitacion cu ta laboratorionan cu por haci test riba cierto productonan; awa ta un di nan. Pues e unico awa cu por bisa cu ta completamente safe, ta esun cu bo ta haya for di WEB, pasobra WEB tin su laboratorio. Nos ta contento si, di wak cu WEB su laboratorio a keda cla, y cu ta bay duna servicio na publico.
Y nos ta spera cu esey lo ta un ayudo pa nos tambe, como Santa Rosa, cu e ora ey nos por hiba samples y haci mas estudio. Aworaki nos a haci un estudio y nos a haya e resultadonan tocante e foyonan, kico ta e tipo di kimiconan cu tin den plantacionnan. Nos mes no por a hacie.
Nos tabata tin un meneer cu a bin Aruba y el a hiba samples di diferente foyo di cunuco di unda nos a bishita, y mi a haya e resultado pa wak kico ta e grado di contaminacion y kico ta e tipo di kimiconan cu tin efecto riba e foyonan. Esey ta e direccion cu nos kier bay. Purba di bin cu mas dato cu nos por mustra e peligro di e contaminacion den awa”, Directora di Santa Rosa, Nathalie Maduro a splica.
