Expectativanan ta halto pa Weganan Interinsular 2024

Jessy Beukenboom di IBiSA:

• Nan ta cuminza Diabierna awor na Aruba 

ORANJESTAD (AAN): E siman aki durante conferencia di prensa, Sr. Jessy Beukenboom di IBiSA a expresa cu un bes mas nan tin e honor pa organiza Weganan Interinsular.

   Na aña 2023 Weganan Interinsular a reinicia cu 6 disciplina. E aña aki e competencia a aumenta di 6 pa 9 disciplina. E aña aki Aruba tin e oportunidad pa habri Weganan Interinsular 2024. E delegacionnan ta yegando Aruba dia 29 di februari pa aclimatisa y prepara pa e competencia.

   E apertura ta tuma luga diabierna awo dia 1 di maart na Compleho Deportivo Frans Figaroa na Noord. Despues di e apertura lo tin reunionnan tecnico y lo start di biaha cu e competencianan. Lo evalua pa den futuro, cual disciplina nobo por forma parti di e competencia. Sr. Beukenboom a indica cu lamentablemente no por sigui amplia mas, pa motibo di presupuesto, capacidad aereo y capacidad di lohamento.

   E aña aki mester a parti e delegacionnan den 2 diferente hotel, cual no ta normal paso semper nan a keda hunto den un luga. Tambe, Sr. Beukenboom a indica cu ekipo di IBiSA a prepara un programa completo desde yegada di e delegacionnan te ora cu nan regresa back nan pais. Aruba, Bonaire y Curaçao ta participando den e deporte di trefbal di mucha muhe, dam y ahedrez. Ademas di esaki, Sr. Beukenboom a mustra e t-shirt cu tur hoben lo ricibi y e medayanan cu lo otorga na e ganadonan.

   Pa finalisa, Sr. Beukenboom ta invita Pueblo di Aruba pa acudi na e weganan pa apoya nos muchanan y pa tene cuenta cu e reglanan. Pa cierto deporte manera dam y ahedres, no ta permiti publico. E mayornan por atende, pero mester keda un distancia paso den e deportenan ey no mag di tin sonido y/of hende no mag di papia. E hobennan mester tin trankilidad y pa por practica nan deporte manera mester ta. Na e ceremonia di apertura y na e wega di trefbal si ta permiti publico.