Tocante tema di Agricultura:
*Sector Primario lo haya mas atencion!
ORANJESTAD (AAN)—Minister di Transporte, Integridad, Naturaleza y Asuntonan di Adulto Mayor, den entrevista cu DIARIO a indica cu e dialogo entre Aruba y Parlamentarionan di Curacao, St. Maarten y Suriname tocante e tema di Agricultura, a bay hopi bon y awor e sector primario lo haya mas atencion.
Den liña grandi a presenta e vision cu tin pa sector primario na Aruba y con nos por colabora cu otro. E mandatario a splica cu na Mei 2023 Aruba tabata anfitrion di Aruba di Dutch Caribbean Agro Conference, y eynan caba nan a yega na un MoU pa colabora cu otro, p’asina aki fortifica e sector primario den henter e Reino.
“Surinam ta hopi mas avanza cu mayoria di nos den Reino, y e por yuda nos pa logra nos metanan, y di e forma aki nos a discuti mirando cu aworaki 3% so di nos alimentacion nos ta produci. E meta ta pa na 2025 nos por yega 10% y pa 2030 nos por yega 25%. Mi por bisa cu e ta un mision ambicioso, pero mi ta kere cu tin tur e ingredientenan localmente, y tin hopi agricultor caba cu ta plantando, pero loke falta awo pa nan por upscale nan proyectonan pero e ta rekeri financiamento” Arends a señala.
E mandatario a agrega cu den colaboracion cu su colega Minister Wever, ta bay establece e “Agrifound” unda cu lo duna fondonan na e agricultornan di cinco mil te 200 mil florin, cu un interes di 2% y asina nan ta pensa cu lo stimula tambe e sector aki.
“Fuera di esey nos ta bezig tambe cu un proyecto, den colaboracion cu Ministerio di Economia y tambe Ministerio di Naturaleza. Nos ta trahando pa bin cu un ‘Agro Innovation Park’, unda cu lo bay tin diferente proyecto di agricultura cu lo tuma lugar riba un solo tereno, p’asina aki nan por sirbi como proyectonan piloto pa nos por haya dato, y asina poco, poco ‘scale up’ e proyectonan aki pa nos por yega na seguridad alimenticio (food security) na Aruba”, e dignatario a bisa.
El a añadi cu loke e pandemia a siñ’e ta Aruba no por keda depende solamente di importacion, y tin diferente profesional na Aruba, cu tin añanan di experiencia den e ramo di agricultura pero tambe den cria di bestia, y cu financiamento nan por upscale nan proyectonan y asina yuda gobierno logra su meta di “food security”.
