ELMAR a participa den e Expo di STEM X Youth Summit

Como parti di Engineer Week 2024

ORANJESTAD (AAN):   E proposito di e cumbre hubenil di STEM X, organisa pa FUTUR Aruba, ta pa fomenta e interes y participacion di e hobennan di Aruba den e areanan di Ciencia, Tecnologia, Ingenieria y Matematica (STEM). E tabata un honor pa ELMAR por a forma parti di e Expo aki, inspirando e hobennan innovativo di Aruba pa explora e areanan aki, especialmente den e ramo di distribucion di energia.

Durante e Expo, ELMAR a stimula consumo consciente cu su demostracion di Smart Meter Readings. Bishitantenan a keda asombra ora nan a descubri cu un blow dryer ta uza rond di 10 amper (e por depende) cu ta e mesun cantidad of mas energia cu un aircondition ora di cende rond di 8 amper (e por depende).

Adicionalmente, e evento a brinda ELMAR e oportunidad pa contesta preguntanan cu e hobennan innovativo aki tabata tin tocante carera den distribucion di energia.

Tambe ELMAR a tuma un biahe bek den tempo cu su exhibicion di "100 Aña di Distribucion di Energia", un tributo special dedica na e historia di distribucion di energia riba nos isla, Aruba. E exhibicion a celebra e evolucion y progreso di distribucion di energia na Aruba.

Y sin lubida ELMAR su 'elektrische spel', cu a captura tur e hobennan cu hopi diversion!

ELMAR ta gradici FUTURA Aruba pa e invitacion. Alabes gradici tur e hobennan cu a bishita nan booth y comparti cu ELMAR nan pasion den areanan di STEM. Y finalmente, ELMAR ta gradici nan tecniconan cu a representa nan na e Expo aki.