Exitoso WEB Bike Ride teni den fin di siman

ORANJESTAD (AAN): Den fin di siman, a mira cu empleadonan di WEB cu ta forma parti di e directiva di Sport Vereniging WEB, a tene un “WEB Bike Ride” tambe.

   Segun Miguel Cortes kende ta president di SV WEB, a splica cu pa algun tempo caba ora di tene eleccion pa directiva, tabata ricibi suplica di e miembronan pa nan organizacion deportivo tambe tene ‘Bike Ride’.  Esey ta debi na e hecho cu gran cantidad di empleado di WEB Aruba NV tin nan Harley y motorcycle.

   Pesey pa 2023 a dicidi pa organiza un WEB Bike Ride pa e empleadonan so, pero ta parce cu el a bira mas grandi cu participacion di mas fanatico fiel.

   Originalmente tabatin 61 persona inscribi pa participa cu 37 motorcycle, y directiva tabata kier a mira con un Ride cu e cantidad ey ta move sin problema y kico tin di tene cuenta cune.

   Sinembargo e WEB Bike Ride no a keda secreto, y varios Club local a haya sa di dje y a yega pa asina participa tambe, cumpliendo cu tur regla stipula.

   E grupo a sali for di WEB Aruba mes na Balashi y a core riba un ruta prepara pa Tony v.d. Bosch.  Segun Cortes, e ta pronostica cu pa nan siguiente Bike Ride na 2024, e lo por bira mas grandi, y tur esaki si acaso e miembronan di SV WEB lo acepta y of dicidi otro den reunionnan.