Brasa bo Cultura
ORANJESTAD (AAN): E aña aki, Fundacion Chico Harms ta celebra e di 13 edicion di Dia di Brazil cu un programa di evento durante luna di juli, augustus, y september 2023. Ta habri e temporada 2023 cu e mensahe di ‘Brasa bo Cultura’, comparti pa Mr. Chico Harms na e comunidad di Aruba.
Den cuadro di e celebracion di Dia di Brazil, Aruba Tourism Authority a mira e importancia den uni cu Fundacion Chico Harms pa realisa Dia di Brazil 2023 pa asina por mantene y sigui engrandece nos cultura entre tur generacion.
Por participa na e programa oficial di evento cu ta lo siguiente:
(*) 29 di juli 2023 pa 7:30 di anochi: Festival Cantica di Caya na Centro di Bario Brazil.
(*) 19 di augustus pa 8’or di anochi: Fiesta (Batacaso) Tipico na Centro di Bario Brazil.
(*) 26 di augustus pa 7’or di anochi: Lo corona reina cultural categoria di baby te cu gran dama, y lo corona e pilar cultural. Un pilar cultural ta un señora cu tin un impacto positivo pa e cultura di Aruba.
(*) 1 di september 2023 pa 6:30’or di atardi: Parada cu Lanterna lo cuminsa na Centro di Bario Brazil caminda cu tur participante lo cana cu un lanterna den man pa lusa e caminda.
(*) 2 di september 2023 pa 8’or di anochi: Fiesta di Tambu y aniversario di Centro di Bario Brazil. Evento lo tuma lugar na Centro di Bario Brazil.
(*) 3 di september 2023 pa 3’or di atardi: Parada Folklore Cultural y Dia di Brazil. E parada lo sali y termina na Centro di Bario Brazil y lo worde acompaña pa 10 diferente grupo musical.
A.T.A. ta invita e comunidad di Aruba y bishitante di e isla pa uni y presencia e eventonan aki pa hunto brasa nos cultura.
