Exitoso proyecto “Pasa pret cu Rotaract” cu un concepto diferente e aña aki den su di 8 edicion

ORANJESTAD (AAN)— Giancarla Lobbrecht, lider di proyecto “Pasa pret cu Rotaract” cual su di ocho edicion a tuma lugar Dia 29 di November ultimo,

a splica den entrevista cu DIARIO, cu e biaha aki tabata un concepto diferente. Esaki ta un evento anual en conexion cu Dia Universal di Derecho di Mucha.

Giancarla a splica cu nan a haci diferente keiro y weganan na cant’i caminda, unda nan a pasa na 13 stacion cu wega. E actividad aki a wordo organiza hunto cu IBiSA, y den cada post nan a haya un pasport pa haci e wega y cada wega a haya un stempel.

Despues di a termina cada wega nan a bay dilanti pa participa pa haya premio. Tabata tin diferente premio pa grupo y individual, premio pa e diseño tabata tin riba e flanel, tambe premio di tombola.

Giancarla a menciona cu esaki ta un proyecto cu Rotaract ta desaroya tur aña, ya pa ocho aña consecutivo, en conexion cu e Dia Internacional di Derechonan di Mucha.