ORANJESTAD (AAN) – Parlamentario Setty Christiaans- Yarzagaray, den conferencia di prensa di fraccion di MEP, a acentua tocante e campaña di concientizacion cu a cuminza Diahuebs siman pasa, contra violencia di hende muhe, adulto y mucha.
Tur organizacion y Instituto, cu ta traha pa hende muher a cende luznan orange. E parlamentario a para un rato keto na esaki, pasobra na dado momento por mira nan riba caya, of den un cruzada cu un box, unda ta pidi donacion pa por yega na fondo e Centro di Hende Muher.
E parlamentario a pone hopi acento riba e organizacionnan cu ta traha riba e tereno aki, pasobra e ta algo cu ta biba den e comunidad “y tin ora e ta mas cerca di nos, cu nos ta pensa y tin biaha e ta den silencio”, Parlamentario Christiaans-Yarzagaray a señala, y a agrega: “Pesey, mi kier para keto un rato y duna atencion na esaki, pa asina e hendenan aki tambe por sigui haci nan trabao, pasobra nan ta support e hendenan muher cu ta cay den e parti di violencia domestico y logicamente relacional, y den e aspecto di Covid-19 e no a hacie mas facil. Nos sa cu economia no ta draai desde Covid, manera e tabata draai prome, y esaki a trece cune cu e famianan ta mas tenso, y tambe hopi biaha e hende muher, e mucha muher ta esnan mas vulnerable pa cay victima di situacionnan asina”, e dama parlamentario a señala.
El a indica cu den e comunidad aki, esaki ta sosode y ta touch tur hende ora e ta pasa, y hopi biaha den e silencio di e hogarnan di esnan cu ta mas cerca di nos, y pesey tambe Parlamentario Setty Christiaans-Yarzagaray ta papia di e tema aki.
Ta trata aki di dieseis dia di campaña cu ta termina dia 10 di December, cu ta Dia Mundial di Derechonan Humano. “Pues ora bo wak nan riba caya reflexiona y ban purba combati violencia contra, tanto hende muher como mucha muher”, Setty Cristiaans-Yarzagaray, di fraccion di MEP a bisa, concluyendo e tema aki.
