Saskia J. Correa a logra su specialisacion como medico psikiatra

ORANJESTAD (AAN): Cu tremendo orguyo mayornan di dokter Saskia J. Correa, Antonio Correa y Angela Correa-Wernet, su ruman Jaritza J.Correa, su casa Jorge Thomas, su yiunan Sophia y Jérôme y demas famia y amigonan ta felicita Saskia cu su gran logro di specialisacion como medico psikiatra.

Na Aruba Saskia a sigui  Colegio Arubano HAVO y VWO te aña 2004.  Na Hulanda Saskia a cuminsa y termina  su propedeuse den biologie en medische laboratorium onderzoek na Groningen den un aña.Tambe Saskia a studia Gezondheidswetenschappen durante dos aña. Na September 2007 Saskia a logra pasa e loting y drenta e estudio di su soño, cu ta medicina (geneeskunde). Un estudio di seis aña.

Na July 2014 su soño a bira realidad y Saskia a logra termina su master den medicina na Vrije Universiteit Amsterdam (basisarts). Den e trayectoria aki e la haci dos stage/co-schap na Aruba.

Despues di a caba su estudio di medicina (geneeskunde) Saskia a bai traha den e ramo di psikiatria como basisarts riba clinica.

E tempo ey Saskia kier a sigui specialisa pa bira dokter di cas (huisarts). Pero e ramo di psikiatria a atrae Saskia asina tanto cu e la dicidi di sigui e specialisacion pa bira psikiatra. Un estudio di cinco aña.

Dia 1 di November 2021 Saskia a termina su estudio y awor e ta dokter specialista den psikiatria. 

Actualmente Saskia ta trahando como psikiatra na Hulanda y ta gozando hunto cu su famia di e gran logro aki.

Saskia kier motiva hobennan di Aruba cu ta studiando pa dokter pa specialisa den e ramo di psikiatria pasobra e ta duna bo hopi satisfaccion den bo trabou.