“Excellence Awards 2021” ta honra e personanan cu ta sobresali den servicio den e sector turistico

ORANJESTAD (AAN): Minister di Turismo y Salud Publico Dangui Oduber hunto cu colega Minister di Labor Glenbert Croes tabata presente na AHATA su “Excellence Awards 2021”.

E bunita ceremonia anual a tuma lugar diahuebs den e ballroom di Hyatt Regency Aruba Resort. Den e ceremonia aki ta honra e personanan cu ta sobresali den servicio den e sector turistico. E sector turistico ta sostene 88% di e economia (GDP) di Aruba.

            Despues cu Aruba a conoce un caida drastico den turismo door di e pandemia. Awor den e fase di recuperacion di nos turismo, servicio ta un parti esencial y esaki no por ta posibel sin nos embahadornan di turismo. E elemento di suma importancia pa e bienestar di nos economia ta e nivel di servicio personal cu nos ta brinda na e turista. Pesey e premio di AHATA’s Excellence Awards ta di sumo importancia, segun e mandatario.

            Tabata tin 38 nominado y mester bisa cu tur tabata un ganador ariba nan mes, mirando cu nan ta wordo escohi for di mas di 10,000 empleado den e sector aki.

            Minister Dangui Oduber ta manda palabranan di felicitacion y aprecio na tur e nominadonan y e ganadornan. Cada un di bosonan ta contribui grandemente cu e sector turistico, brindando servicionan di calidad na nos bishitantenan. 

            Den nomber di pais Aruba e mandatario a felicita AHATA su team pa haci e evento aki uno exitoso.