Prome Minister Wever-Croes: *Gobierno no por compromete pa stop e recorte di 12.6% e luna aki
ORANJESTAD (AAN): Diabierna anochi, Prome Minister Evelyn Wever-Croes a haci un declaracion publico unda el a dirigi na e sindicatonan. Esaki tabata den cuadro di e reunion cu tabata tin cu sindicatonan dia 1 di December ultimo y e carta cu gobierno a ricibi di e sindicatonan diahuebs.
Ta conoci cu tur e protestanan di e sindicatonan ta pa gobierno revoca e recorte di 12.6% den e salario di e empleadonan publico. Relaciona cu esaki Prome Minister a urgi e lidernan sindical den un carta pa reconsidera nan posicion.
El a expresa cu e sosten di likides di Hulanda ta e unico forma cu Aruba por bay atravesa e lunanan benidero y pa e motibo aki gobierno di Aruba no por compromete su mes pa stop e recorte di 12.6% e luna aki manera e sindicatonan a pidi.
Wever-Croes a expresa cu e intension ta pa bay para hunto y dialoga pa yega na un proposicion pa negocia cu Hulanda. E ta lamenta cu no tur sindicato a acepta e proposicion aki. Tin comprension si pa e lucha sindical y pa e sacrificio cu tur empleado a haci.
Finalmente, Prome Minister a urgi tur lider sindical pa no bay organisa un paro general, pero pa reconsidera y acepta e proposicion pa dialoga. Yega na un punto di salida conhunto pa asina bay negocia cu Hulanda. "Esey so ta den bienestar di tur empleado di pais Aruba".
E mandatario a remarca cu e ta keda den spera di ohala un contesta positivo di e sindicatonan pa dialoga
