Excelente recital di piano duna pa Jr Arends Piano Studio

ORANJESTAD (AAN): Diasabra ultimo den un Sala Unoca completamente yen, e asina yama “Jr Arends Piano Studio” a tene su recital anual di piano 2024.

   Tabata un atardi yena cu ambiente musical caminda un total di 29 studiante a sa di presenta diferente cancion na un manera asina fantastico.

   Na comienzo di recital a hasi uso di e ocasion pa bautismo di e buki cu ta carga e nomber “Junior Piano Basics, A fun start for kids Book 1” un produccion di Jr Arends Piano Studio y cu Junior Arends como autor.

   E buki aki ta contene cancionnan tradicional conoci pero cu pista di acompañamento cu ritmonan caribense contagioso. E buki aki lo sirbi como un instrumento pa yuda introduci e piano na un manera facil y alegre no solamente pa mucha pero tambe adulto. Sra. Virna Arends a fungi como madrina y mientras Sr. Elthon Lampe como padrino.

   Un danki sigur ta bai na tur participante pa nan dedicacion, esnan presente y tur cu a aporta tanto pa e produccion di e buki y pa e atardi aki tabata uno fenomenal. Pa esnan interesa den e buki of cualkier otro informacion por haci esaki via WhatsApp di 564-0590.