Aruba y Brasil conecta cu evento inaugural di GOL Airlines for di aeropuerto São Paulo

Un logro significativo pa tur dos destinacion

ORANJESTAD (AAN): Aruba ta bira un pais mas accesibel pa tur huesped Brasilero danki na vuelo inaugural directo y nobo di Gol Airlines. Un vuelo cu ta conecta São Paulo-Guarulhos (GRU) cu Aruba (AUA).

   A celebra y honra e logro monumental aki durante un recepción di bonbini den Lounge Inter GOL Smiles hunto cu representantenan di GOL Airlines Danilo Barizan – Commercial Director y Rafael Araujo – Director of Planning, Wieneke Vullings – Consul General di Reinado Hulandes estableci na Brazil, y delegacion di Aruba cu a consisti di Ronella Croes – CEO di A.T.A., Sanju Luidens – CMO di A.T.A., Jordan Schlipken – Director di A.T.A. LATAM, Andrew Hoo – Director di Inmigracion di Aruba, y Carlos Barbosa – A.T.A. Brazil. E vuelo inaugural G3 7716 ta simbolisa no solamente comodidad, pero tambe ta fortalece e laso cultural y economico entre Brazil y Aruba.

   Durante di e ceremonia na aeropuerto GRU na Brazil, Ronella Croes, CEO di Aruba Tourism Authority, a expresa su gratitud sincero na tur socio cu a haci e logronan aki posibel. ‘Esaki sigur ta un soño cu nos a cultiva durante hopi aña y cu ta bira realidad awe. Nos ta gradici tur huesped cu a eligi Aruba como su destino pa disfruta di e temporada di fiesta y asina duna inicio exitoso na e vuelo non-stop aki .’ Señora Croes a destaca

   E ruta directo nobo aki ta reduci e tempo di biahe entre Brazil y Aruba pa solamente seis ora y mei, cual ta haci Aruba e isla Caribense di mas accesibel pa e huesped Brasilero, for di e mercado di Sao Paulo.

   Como un pais cu pa durante 40 aña a traha duro pa keda resalta den e region, por bisa cu Aruba ta un destino Caribense popular pa huespednan Brasilero. Cu e vuelo aki, Aruba Tourism Authority (A.T.A.) ta anticipa un crecemento signifcativo den e mercado specifico di Brazil, reforzando e posicion di Aruba como e destino prefera pa huespednan di Brazil.

   Aruba ta sigui fortalece su presencia den mercado Latino America, cu un proyeccion pa ricibi alrededor di 182,838 di e mercado aki na final di 2024, representando un resultado adicional di 39% compara cu 2023. Danki na un strategia exitoso di diversificacion, desde 2014 e mercado di Brazil a logra un crecemento positivo promedio anual di 25%, un cifra cu a subi te na 54% den e ultimo tres aña.

   E huesped Brasilero ta conoci pa tin un patronchi di gasto mas halto cu hopi otro mercado. Segun e estudio mas recien di tarheta di credito Visa, brasileronan ta gasta un promedio di $685 pa dia pa cada persona cu tin un tarheta di credito y ta usa esaki durante di nan biahe na Aruba, poniendo nan como e tercer mercado cu ta gasta mas riba e isla despues di Chile y Estados Unidos. Cu e mercado di Colombia ya caba stabilisa, e ruta nobo entre São Paulo, Brasil, y Aruba lo sigui sostene un aumento den ‘market-share’ di Latino America, subiendo e di 8% di e total di huesped na 2014 pa un estimacion di 14% na 2024. Y cu mas di e huespednan aki, Aruba lo sigui atrae mas di e mercado cu patronchi di gasto mas eleva cu otro.

   E conexion nobo di Gol Airlines ta parti di un expansion mas grandi den aviacion Latino Americano. Pa 2025, un total di 305,000 asientonan lo worde poni disponibel pa vuelo entre Aruba y e region. E logro aki ta refleha e compromiso di Aruba pa haci e isla cada biaha mas accesibel cu huespednan cu patronchi di gasto halto for di Latino America.

   Un gradicimento na Ministero di Turismo, Aruba Airport Authority (AAA), y ekipo di Aruba Tourism Authority (A.T.A.) cu a haci e vuelo aki posibel. Cu brasa habri nos ta yama nos huespednan Brasilero Bem-vindo (Bonbini).