Evento estilo bakesale pa yuda Miss Teen Aruba International cu fondo

Diadomingo den dia na Club Primavera

ORANJESTAD (AAN): Den un entrevista cu George Winterdaal, kende ta fundador di GLW Foundation, cu ta organizador di evento di e.o. Miss Teen Aruba International 2025, el a splica cu semper nan organizacion sa haci evento pa tur hende, ora di trata di yuda recauda fondo.  Pero e biaha aki, nan ta haci esaki pa nan mes.

   E ta un evento di fundraising pa yuda e candidatanan di e certamen cu ta bay representa Aruba den exterior.  Pesey tin un actividad riba Diadomingo na Club Primavera.

   Viahenan pendiente: Segun Winterdaal, GLW Foundation ta den pleno preparacion pa salida di Miss Teen Aruba International Tara van der Werk y tambe Little Nuestra Belleza Aruba Elise Heronimo.  E dosnan aki lo sali Diadomingo 19 di October rumbo pa Punta Cana (Rep. Dominicana) pa asina representa Aruba na certamen di Nuestra Belleza Internacional.  Aki Tara lo competi den categoria Teen y Elise den categoria Little.  Ambos candidata ta preparando pa asina representa Aruba a lo maximo.

   Na luna di Maart 2026, Aruba tin Jehdaeiah Flanegin kende lo representa Aruba na Mexico pa Teen Turismo Cultura Internacional.  Tambe tin Qryna Alleyne kende lo representa Aruba na Mei 2026 den Teen Turismo Mundial cu lo tuma lugar na Punta Cana na Republica Dominicana.

   Cos di come y bebe: Diadomingo awor for di 10:00 am te cu 6:00 pm, na Club Primavera lo tin benta di CakeBox, Snackbox, Pan cu Ham di Pasco, Johnny Cake cu Keeshi y Bacalao, Nuggets, Aros con Pollo, Sopi Carni y Sopi di Galiña.

   Tambe nan lo tin cos dushi manera Cuki di Lerchi, Cocada y Pan Dushi.  Pa refresca garganta lo tin refresco, juice, awa y cerbes bon frieu. Tambe lo tin algun mesa disponibel pa por sinta hunga y comparti un rato. Tambe lo tin un box disponibel si ta desea di haci un donacion na e hobennan. 

   GLW Foundation ta invita pueblo pa pasa Diadomingo na Club Primavera (conoci como Club Portugues) pa asina pasa busca algo dushi di come, unda no mester cushina y aporta na un bon causa ya cu e candidatanan aki lo representa Aruba den exterior.