Consul general di Colombia Luis Gustavo Serrano:
ORANJESTAD (AAN)—Diahuebs atardi, Consulado General di Colombia a yama un conferencia di prensa, den cual Consul General señor Luis Gustavo Serrano, a hiba palabra y tambe señora Grislynn Hernandez, di Fundacion VeneAruba Solidaria.
Consul Serrano a inicia bisando cu, manera ta conoci, siman pasa Minister Arthur Dowers a anuncia den rueda di prensa, cu for di entrante dia prome di October y te 31 di December, ta duna inicio na e trayecto #4 respecto e regularizacion di e imigrantenan, na Aruba.
“E proceso aki, el a comenta den dicho rueda di prensa, cu ta forma parti di e programa di e Prome Minister Mike Eman, encabeza pa e Minister di Husticia cu a bin t’adelantando for di mas cu un luna caba. T’asina cu e Asociacion di e Cuerpo Consular na Aruba a wordo invita den su momento, di parti di DIMAS, na unda nos a wordo informa tocante dicho regularizacion y nos a haya e oportunidad di haci comentario y duna sugerencianan, cu na su momento a wordo teni den cuenta.
“Hunto cu ACNUR, e Consulado di Colombia na Aruba, nos a celebra un acuerdo cu DIMAS, pa apoya e programa aki di regularizacion, cu ta parce nos sumamente importante den cual e imigrantenan cu no tin nan situacion migratorio debidamente regulariza, por obtene nan permiso pa permanece na Aruba den forma legal.
“T’asina con e dos entidadnan aki, Consulado di Colombia y ACNUR nos a designa recursonan propio, cu e fin di apoya e proceso aki, y nos ta contando cu e apoyo logistico di e Fundacion VeneAruba Solidario cu ta bay ta nos operador autoriza”, Consul di Colombia a señala.
El a menciona e cuater trayectonan di e proceso aki di regularizacion: “Nan tur a inicia, pero tin algun cu a cuminza un poco mas atras. E prome trayecto ta dirigi na e imigrantenan cu ta conta cu un garante pa solicita nan permiso. E trayecto 2 ta dirigi na studiantenan y otro categorianan. E trayecto 3 ta un trayecto bastante novedoso y interesante. E ta dirigi na e imigrantenan cu ta conta cu permisonan previo durante cinco aña, cu por solicita un permiso pa otro cinco añanan, y durante e tempo ey nan por cambia di doño di trabao, por traha den forma simultaneo, durante e periodo aki di cinco aña. DIMAS a reduci e costo e costo di dicho permiso cu ta bay ta di solamente 2 mil florin pa e termino di cinco aña. Y e trayecto 4 cu a inicia Diaranzon di e siman aki, DIMAS lo otorga un permiso di un aña, pa e personanan cu no ta conta cu garante y durante e aña ey e persona lo tin e oportunidad di busca un doño di trabao cu firma p’e, y na e momento ey por solicita pa un permiso cu por ta di cinco aña”, Consul Luis Gustavo Serrano a señala.
