Evah Ras eligi como e di 60 Reina Hubenil di Carnaval di Aruba

ORANJESTAD (AAN): Diasabra anochi a tuma lugar den Aruba Entertainment Center na Dakota, e eleccion di Reina Hubenil di Carnaval 70.

   Esaki tabata e di 60 eleccion den historia di Carnaval di Aruba, y e biaha aki por a mira cu e participantenan a bin fuerte pa duna presentacion cu a laga nan fanatico grita di euforia y haci nan apoyo aun mas grandi.

   Huradonan tabatin un trabao fuerte e anochi, y na final e ganadora maximo di Reina Hubenil a bira Evah Ras, representando Dushi Carnival Group.  Un teenager cu a briya riba escenario cu su presentacion, su sonrisa, e aura y energia cu el a transmiti riba escenario.

   Prome Finalista a bira Kiziah Ras, di Champagne Carnival Group cu tambe a haci un fenomenal trabao.

   Premio di Mihor Trahe di Carnaval a bay pa Kiziah Ras (Champagne Carnival), Best Show pa Eleccion Hubenil a bay pa Evah Ras (Dushi Carnival), Mihor Speech pa Eleccion Hubenil a bay pa Kiziah Ras (Champagne Carnival).

   Tambe Miss Popular pa Eleccion Hubenil a bira Kiziah Ras (Champagne Carnival).  E premio di Reina di Pay.Aw 2025 a bay pa Kiziah Ras (Champagne Carnival).

   Algo cu hopi hende a comenta, ta e uso di dos Maestro di Ceremonia kendenan ta basta hoben, y cu alavez a dirigi e show na un forma perfecto y admirabel.

   Palabra di pabien na tur candidata, tambe na e Comision di SMAC responsabel pa e evento.