Camila-Victoria Feliciana eligi como Reina Infantil di Carnaval di Aruba

ORANJESTAD (AAN): Diasabra anochi a tuma lugar den Aruba Entertainment Center na Dakota, e eleccion di Reina Infantil di Carnaval 70.

   Esaki tabata e di 48 eleccion di Reina Infantil den historia di Carnaval di Aruba.  Muchanan aki cu hopi briyo, a subi escenario pa balia, pa goza, y pa demostra tur loke nan por dilanti fanaticonan y tambe hurado.

   Huradonan tabatin un trabao fuerte e anochi, y na final e ganadora maximo di Reina Infantil a bira Camila-Victoria Feliciana, representando Distrito di Noord.  El a haci bunita trabao riba escenario, y tabata sobresali cu su bunita trahe.

   Prome Finalista a bira Dayna del Rosario Rodriguez di Little Groovers Carnival Group cu tambe a haci un excelente trabao.

   Segundo Finalista a bira Noëmi Bergen di Empire Kids/Maria Goretti College.

   Premio di Mihor Trahe di Carnaval a bay pa Camila-Victoria Feliciana (Noord), Best Show pa Eleccion Infantil a bay pa Camila-Victoria Feliciana (Noord), Mihor Speech pa Eleccion Infantil a bay pa Camila-Victoria Feliciana (Noord).

   Tambe Miss Popular pa Eleccion Infantil a bira Camila-Victoria Feliciana (Noord).  E premio di Reina Infantil di Pay.Aw 2025 a bay pa Camila-Victoria Feliciana (Noord).

   Palabra di pabien na tur candidata, tambe na e Comision di SMAC responsabel pa e evento.