Energia ta uno di e puntonan central den comunidad di futuro
*Costo di bida ta depende di energia cu por baha den prijs
*Un isla bendiciona cu solo mester nivela otro gasto pisa
ORANJESTAD(AAN)—Na 2023 atrobe mundo ta tuma nota, con importante energia ta pa hende, cu a conoce un evolucion y adelanto a base cu e materianan prima pa bienestar di hende, ta presente.
E calidad di bida na Aruba sigur ta wordo determina tambe pa e hecho cu Aruba no conoce e necesidad cu por ehempel paisnan friu tin, pa enfrenta temporadanan friu cu ta exigi gastonan enorme pa hende enfrenta.
Aruba a wordo bendiciona cu un clima cu no ta produci calor manera hopi pais cu clima realmente tropical conoce y cu ta produci tur tipo di problema.
Aruba no conoce e tempo cu temperatura ta baha y ta haci cu hende mester proteha su mes, su ambiente y su propiedad contra friu.
Clima di Aruba mester wordo considera un bendicion y pa colmo awor no por bisa mas cu Aruba no tin e material basico pa por ehempel produci coriente y asina mantene hasta industrialisacion adapta na un naturaleza mundial agota.
Aruba ta conta cu dos factor sumamente importante cu ta energia solar y energia di lama cu awor mester wordo uza pa beneficia tur hende.
Na mayoria di paisnan cu un nivel di bida aceptabel, energia alternativa ta mas y mas e realidad.
Energia solar a resulta pa hende moderno un forma sumamente importante pa atende cu e gastonan cu ta dicidi pa costo di bida.
Manera DIARIO semper a trece dilanti, Aruba ta uno di e paisnan cu a conoce un progreso special cu a permiti e poblacion di un isla chikito, produci awa y electricidad na un nivel industrial hopi halto cu tur e costo cu esaki ta encera.
Actualmente e cambio di clima ta encera un solo cu no tin piedad y pa cual alarma a wordo bati na nivel internacional sigur pa personanan cu tin problema di salud cu no ta soporta calor pero tambe pa otro factornan cu DIARIO a trece dilanti den tanto analisis y rubricanan special.
E forma cu petroleo cu ta combustibel principal na Aruba a conoce aumento di prijs, ta afecta e posibilidad pa hopi hende haci uzo di aparatonan necesario pa atende cu calor.
Sinembargo, e entrada di artefactonan nobo cu no ta depende di coriente, ta permiti reduccion di gastonan di coriente, cu hende mester pa sobrevivi un clima cu ta cambia na un isla tropical.
E ciudadano mester tin libertad, mescos cu na tanto pais na mundo, haci uzo di loke ta habri caminda pa e sobrevivi un clima calor y temperaturanan cu lo sigui aumenta cu cambio di clima.
Parlamento mester atende den profundidad cu e situacion aki pasobra no por ta cu na un pais cu ta conoce victimanan di solo cu resultadonan den e cambio di clima pues, no por goza di tur beneficio cu tecnologia moderno ta ofrece.
Mas y mas rond mundo, energia solar y di por ehempel biento, ta bira realidad.
Hulanda por ehempel, manera tambe tanto bez DIARIO a trece dilanti, ta haci uzo di energia di biento y lamar den Noordzee cu a bira centro nobo di energia limpi pa tanto pais na Europa.
Si analisa e situacion sin mas, sigur mester yega na e conclusion, cu Parlamento mester cuminsa atende e tipo di asuntonan aki y cu caminda ta necesario mester sostene menos gasto pa un Pueblo, cu a wordo bendiciona cu un naturaleza cu porfin ta entrega materia prima directo pa reemplasa petroleo, cu segun tanto exploracion dilanti costa, no a resulta di ta presente.
Loke si Aruba tin ta biento, lama y solo cu Pueblo di Aruba mester haya oportunidad di uza na su bienestar personal y asina pa e pais cu tin menos gasto cu hende cu ta bira victima di calor y su resultadonan.
