Estudio nobo a descubri cu comiendo 2 mushroom pa dia por reduci riesgo di cancer cu 45 porciento

PENNSYLVANIA: Si bo come 18 gram di mushroom pa dia, e por reduci e riesgo di haya cancer, segun un estudio nobo ta sugeri.

   Individuonan cu ta come dos mushroom di tamaño mediano pa dia tin 45 porciento menos riesgo di cancer compara cu e hendenan cu no ta come mushroom, segun un investigacion haci na Pennsylvania State University, y publica awor den ‘Advances in Nutrition’.

   Pa varios siglo, mundo di medicina na China a usa mushroom, cu ta rico den vitamina, nutriente, y antioxidante, como un tratamento pa varios malesa, incluyendo malesa di pulmon.  Algun componente quimico den mushroom ta parce di ta forza e sistema di inmunidad.

   E estudio di Pennsylvania a examina 17 estudio di cancer di 1966 te cu 2020, analizando mas di 19.500 pashent di cancer.

   Loke e cientificonan aki a descubri, ta mustra cu aunke e mushroomnan tipo shiitake, oyster, maitake, y king oyster tin hopi mas ergothioneine amino acid compara cu mushroom tipo white button, of mushroom cremini, of mushroom portobello, toch hendenan cu come cualkier variedad di mushroom den nan cuminda di tur dia, tin un riesgo mas abao di cancer.

   “Mushroom ta e fuente di cuminda conteniendo mas hopi ergothioneine, cu ta un antioxidante unico y potente cu un protector di celnan,” ta loke Djibril Ba a bisa, kende ta un studiante postgrado den epidemiologia na Penn State College of Medicine.  “Door di keda suministra bo curpa cu antioxidante, por yuda proteha bo mes di stress oxidativo y reduci e riesgo di cancer.”

   Comiendo mushroom ta wordo hopi liga cu riesgo mas abao di cancer na pecho, pero esaki por bin debi cu hopi estudio no a inclui otro forma di cancer.

   “En general, e descubrimentonan aki ta duna prueba importante di e efectonan protector di mushroom contra cancer,” ta loke co-autor John Richie a bisa, kende ta profesor di Public Health Sciences and Pharmacology na e Universidad.  “Lo tin di sigui haci estudio pa haya sa mihor kico e mecanismonan envolvi ta socede den bo curpa, y tambe cual cancer specificamente ta wordo impacta,” el a agrega.

   Manera ta costumber cu tur estudio nobo, bo mester tin cautela pa interpreta e resultado.  Expertonan sinembargo ya caba a mustra cu e descubrimento aki ta ‘interesante’.

   “Ta importante pa considera comemento di mushroom den e contexto mas amplio di e alimento di un persona, y su actividad fisico, pues e conexion di esey y comportamento.  E revision cu a check e impacto di factornan di estilo di bida riba riesgo di cancer, a demostra cu si bo come fruta y berdura e por reduci e riesgo di varios cancer, y nan por reduci tambe e chens cu bo ta haya sobrepeso cu riba su mes ya ta un riesgo grandi pa diferente tipo di cancer,” ta loke Helen Croker a bisa, kende ta hefe di interpretacion di estudio na World Cancer Research Fund.

   El a bisa cu ta importante tambe pa come un variedad amplio di diferente fruta y berdura pa haya aun mas beneficio.

   Tin indicacion cu hendenan cu no ta come mushroom, en general ta personanan cu ta come masha poco berdura.  Esey por nifica cu esnan cu ta comiendo poco mushroom y otro berdura, ta naturalmente core riesgo di mas halto pa haya cancer.

    Pues e recomendacion ta pa come mas fruta y berdura, y no djis bay awor enfoca so riba mushroom of otro ‘cuminda milagroso’.