Situacion na Hospital a empeora y ta spera cu e casonan lo sigui subi

ORANJESTAD (AAN):  Specialista Dr. Yuri Casseres di Dr. Horacio Oduber a papia durante e conferencia di prensa yama pa Crisis Team y Gobierno.

Dr. Casseres a bati alarma riba e situacion di Hospital unda el a bisa cu e situacion na HOH a empeora y ta spera cu e lo escala den e dianan aki. Den un siman di tempo a mira cu 4 biaha mas pashentnan a wordo interna.

Esey kiermen cu si siman pasa tabata tin 5 pashent, awe tin 20, a splica. Y ta spera cu e cantidad ta bay sigui subi tambe.

HOH hunto cu Crisis Team a dicidi cu mester tuma medidanan pa frena e desaroyo aki pasobra na un dado momento hospital ta bay yena cu cama, pero tambe ta bay tin personal cu tin cu bay atende cu e pashentnan como tambe mas ekipo lo mester wordo poni disponibel.

El a remarca cu si sigui bay asina aki cu e cifranan di contagionan nobo di Covid-19  Hospital lo haya problema di tin cu bay scoge entre cual pashent lo mester atende si of no y na e punto ey no kier yega.

Pesey un peticion ta bay na comunidad pa atene na e reglanan vigente pa evita mas contagionan.

El a sigui bisa cu e mediconan ta haci nan best pa yuda tur hende, pero ta pidi tur hende pa yuda y coopera ya cu ta bay yega un momento unda e capacidad ta bay ta limita.

Segun Dr. Casseres tin un plan pa escala, pero no kier yega eynan y cu tin cu stop cierto cuidonan pa bay atende cu Covid so pasobra a haci esey caba den pasado y tur hende sa kico e consecuencianan ta.

Tin cu corda tambe cu riba Cuido Intensivo (ICU) no ta solamente casonan di Covid tin, pero otro casonan cu ta keda bin y no por cera hospital pa COVID so, Casseres a enfatisa.