LOS ANGELES: E cantante originalmente di Barbados, Rihanna, cu ta e artista musical femenino mas rico na mundo, a subi e lista di “Biyonario” di e revista Forbes danki na su negoshinan di moda y beyeza, y su balor ta worde calcula na 1.7 biyon Dollar.
Cu un articulo dedica an e empresario di 33 aña aki, e publicacion a divulga e siman aki cu Rihanna tin e di dos fortuna global di mas grandi di muhernan cu ta dedica nan mes na entretenimento, y e ta na di dos lugar tras di Oprah Winfrey.
Su nomber di berdad ta Robyn Rihanna Fenty, y el a haci su cartera considerablemente mas diki desde cu el a worde considera como e cantante mas rico na mundo na 2019, principalmente di e ganashi cu su compania di beyeza, Fenty Beauty a produci, di cual e ta 50% doño.
Como 1.4 biyon Dollar di su balor ta coresponde na Fenty Beauty, y 270 miyon ta atribui na su compania di lingerie Savage x Fenty, y e resto di su ganashinan como estrella musical y actriz.
A revista a indica tambe cu Rihanna ta worde mira como e empresario di beyeza cu a logra mas exito usando social media, unda e ta conta cu miyon di fanatico, pa asina promove su negoshinan.
E cantante a lanza Fenty Beauty na 2017 hunto cu e conglomerado di luho frances LVMH cu e meta pa bin cu productonan exclusivo, ofreciendo un rango amplio di color de nan basenan di makeup, cu como 40 tono, pa yega na un diversidad di mas grandi di cliente.
For di e tempo ey, el a expande su lineanan. Ni un aña pasa el a presenta un gama pa cuido di cuero, Fenty Skin, y lo lanza dentro di poco tambe Fenty Parfum, un fragrancia unisex crea pa e artista.
Na 2019 el a crea Fenty, un marca di moda y accesorio ‘prêt-à-porter’ bao di e compania LVMH mes, cu ta propietario di companianan manera Dior, Givenchy, y Kenzo, pero na comienzo di 2021 a bisa cu nan ta stop cu e actividadnan sperando cu situacion mehora despues di e pandemia.
Encuanto su carera musical, e ganadora di Grammy a lanza ocho album di studio prome cu el a declara cu e lo dedica su mes completamete na su negoshinan. E ultimo album di dje, ‘Anti’ a sali na aña 2016. Aunke den ultimo lunanan el a bisa cu e ta trahando riba di nuebe album.
