ORANJESTAD (AAN): Tin un grupo grandi di personanan cu ainda ta hayando FASE. A pesar cu comercio ta bisa cu tin trabao, tin personanan cu ta hayando FASE pero banda di esey tin otronan cu no kier traha.
Prome Minister Evelyn Wever-Croes a duna di conoce cu mester bay check kico ta e problema den e sector aki.
El a bisa cu el a haya sa di un grupo cu el a combersa cu nan cu ta hayando FASE ta cu nan a bisa cu nan carchi berde pa traha den F&B Sector a caduca of pa no tin y ta costa nan 140 florin pa haya un carchi nobo y nan no tin e fondo ey.
Esaki ta algo cu el a pidi su coleganan minister pa mira con por yuda e grupo aki y si esey ta e unico 'bottleneck' pa yuda nan y toch nan por yega na dje pa nan bay traha, a bisa.
Segun e mandatario, un hende cu ta haya FASE no tin e obligacion pa bay traha, pero esey ta algo cu kier purba cambia prome boluntariamente y si no logra boluntariamente e ora tin cu bay enforsa esaki.
