ORANJESTAD (AAN) -- Manera ta conoci, Formador Evelyn Wever-Croes, ta sigui reuni cu e stakeholders den comunidad, y awo a toca turno na Asociacion Amigos de Colombia.
Den e conferencia di prensa cu ta sigui na reunionnan diario cu Formador, señor Moises Fernandez a trece dilanti su percepcion encuanto e encuentro aki.
Fernandez a cuminza pa expresa cu e Asociacion ta sinti su mes orguyoso y contento cu e invitacion cu Formador Wever-Croes a haci nan y cu otro ministernan tambe tabata presente y a tuma tempo pa scucha cual ta e necesidadnan cu e comunidad Colombiano residencia na Aruba ta experimentando aworaki.
Fernandez a comenta cu e Asociacion a trece dilanti algun di e puntonan importante cu ta remarca e necesidadnan cu e grupo aki tin.
El a subraya cu ta un secreto cu na Aruba, entre 22 mil pa 23 mil ciudadano Colombiano, ta forma parti di e pueblo di Aruba, cu ta e comunidad di mas grandi despues di e comunidad local.
E Asociacion ta recogiendo e necesidadnan di e ciudadanonan Colombiano cu mester di permiso di trabao, y cu na e momentonan aki ta pasando door di necesidadnan basta fuerte, pa loke ta concerni renovacion di nan permiso di trabao, y asuntonan di salud; nan salud ta mara na nan permiso laboral.
Moises Fernandez a bisa Formador cu e ta kere cu, en principio, e Departamentonan di DPL y DIMAS, mester ta den e mesun pagina, y na final di dia, si ta posible, cay bao mesun ministerio. Esaki ta hopi importante pa aumenta nan eficiencia.
“Loke nos ta experimenta na e momentonan aki, ta ineficiencia di ambos departamento, pasobra nan ta haci cu un persona ta tarda entre seis pa siete luna pa haya renovacion di un permiso. Actualmente, tin demanda laboral den e mercado di Horeca cu mester di empleado y trahadornan, pero nan no tin e vergunning renova y no tin e posibilidad di tuma e trahadornan aki pasobra nan permiso no ta renova”, asina Moises Fernandez a señala pa Formador.
Fernandez a remarca cu esaki ta trece conflictonan pasobra DPL cu DIMAS no tin e mesun lineamento, y definitivamente esaki ta trece un tardanza enormemente grandi.
“ Personanan cu a aplica pa nan firma libre pa mas cu un aña caba, te ainda no por a bin na un conclusion di esaki. Normalmente, un firma liber ta pasobra e persona tabata tin diez aña bibando riba Isla, pero awor ta por lo menos, 12 pa 13 aña bibando na Aruba pa motibo di e tardanza aki. E personanan aki ta keda den un limbo legal, sin sa si e ta legal of ilegal pasobra e no tin un papel den su man cu ta prueba cu e ta legal na Aruba”, señor Moises Fernandez a conclui.
