ORANJESTAD (AAN) — Josette Daal, Presidente di directiva Stichting EPB y señora Diahnne Lejuez, Director di e Stichting, a atende cu e reunion di Formador Evelyn Wever-Croes cu stakeholders, den cuadro di formacion di gobierno nobo.
Den conferencia di prensa despues di e reunion, señora Josette Daal, a duna su impresion tocante e encuentro aki. Tabata presente, ademas di señora Lejuez, meneer Lopez, Director di EPB Playa y meneer Mathilda, director EPB San Nicolas.
Daal a defini e reunion como uno hopi ameno y el a mustra hopi satisfecho, ya cu nan a comparti hopi idea, a papia di diferente “bottlenecks” cu nan ta topa cune, y pa Stichting EPB e tabata ideal pasobra den e grupo cu nan a topa, tabata tin maestronan di scol tambe, y esey semper ta na bienestar di enseñanza. Jossete Daal a expresa cu Stichting EPB ta keda na spera di e minister di enseñanza nobo, pa nan sigui elabora cune.
El a agrega cu un di e prioridadnan cu a menciona na Formador ta uno “comun y coriente” cu ta e scarcedad di maestronan di scol. “Esaki ta un di e preocupacionnan cu nos a trece dilanti, y mirando e tipo di enseñanza y cu nos scolnan cu nos ta representa ta creciendo, nos a pidi un tiki mas flexibilidad den maneho di finanzas. Un di e aspectonan interesante cu nos a trece dilanti, ta cu nos tin e pensamento pa bin cu un ‘Middag EPB’ mirando e edad cu e muchanan ta drenta scol, unda por ubica nan. Nos a papia di Ley pasobra, den e caso di EPB, no tin un ley pa e tipo di enseñanza aki. Esey ta un preocupacion cu tambe nos a trece dilanti”, señora Daal a splica.
Di parti di señora Lejuez, el a menciona cu un punto cu tambe nan a toca, ta cu den e subsidio cu Stichting EPB ta ricibi anualmente, enberdad no tin un post explicito pa profesionalizacion, of proyecto cu e mercado laboral, y nan kier wak mas atencion bay den e aspecto aki.
“Y e Ley pa Enseñanza Profesional lo tin cu bay basa su mes riba esey tambe, pasobra aworaki, nos ta operando segun e Ley di Voortgezet Onderwijs, cu no ta e situacion ideal”, Lejuez a señala.
