Camara di Comercio a duna detaye encuanto posibilidadnan petrolero pa Aruba

Hunto por explora e oportunidad nan economico

ORANJESTAD (AAN): Fraccion di MEP ta reuniendo cu stakeholders tocante e posibilidadnan di industria petrolero pa Aruba. Meta di e reunionnan ta pa comparti informacion, y pa haya sa e pensamento y sentimento di stakeholders.

   Despues di a reuni caba cu algun representante di trahadornan di sector publico y semi publico, representantenan di e fraccion a reuni cu Camara di Comercio. Durante e reunion Fraccion di MEP a enfatisa cu desde 3 di januari 2026 tur cos a cambia pa Aruba, debi cu desaroyo di energia petrolero cu no tabata posibel pa hopi aña, desde e fecha aki no ta un estorbo mas.

   Es mas, Merca tin pensa di inverti 180 pa 200 biyon dollar den industria petrolero di Venezuela, mirando e gran potencial di Venezuela. Y den esaki Aruba por hunga un papel unico y hopi importante, y por probecha di extra entrada.

   “Nos no ta papiando di habri un refineria nobo na Aruba. Nos ta papiando di e posibilidad di lease e tankinan di almacena crudo na Aruba, na companianan cu ta buscando tanki pa almacena e crudo. Aruba ta geograficamente ideal pa e tipo di comercio aki, y e lo no haci un impacto grandi riba nos infrastructura of medio ambiente. Ademas, tin companianan cu ta dispuesto pa inverti den drecha tur e tankinan y asina por almacena mas crudo,” ta loke Parlamentario Evelyn Wever-Croes a bisa.

   “Mirando cu e desaroyo aki ta di impacto abou, pero di balor halto, fraccion di MEP ta di opinion cu no mester laga e oportunidad aki pasa bay. E ta un forma relativamente sensiyo cu Aruba por haya mas entrada, y diversifica nos economia, sin cu e mester costa pais Aruba mes nada.”

   Lider di fraccion di MEP, Evelyn Wever Croes a finalisa bisando: “Tabata un bon reunion y mi ta gradici Camara di Comercio pa nan presencia. Desde oposicion nos ta scucha y aporta na progreso di nos pais.”