Esaki ta Premionan di Estimulo Copa Hubenil Gobernador Felipe B. Tromp 2026

ORANJESTAD (AAN): Den edicion di Diabierna, DIARIO a trece dilanti kendenan ta ganadornan hubenil di Copa Gobernador Felipe B. Tromp pa 2026.

  Ademas di e reconocementonan principal, e Copa Hubenil Gobernador Felipe B. Tromp ta otorga anualmente tambe diferente premionan di estimulo. E meta di e reconocemento aki ta pa stimula hobenan pa sigui desaroya nan talento y compromesonan riba tereno social, cultural y deportivo.

   Den categoria Hubenil, un di e premionan di estimulo ta bay pa Stephanie Quant, pa su actividadnan y logronan riba tereno social y cultural. For di chikito Stephanie a demostra un compromiso special cu cantamento y otro expresionnan artistico, semper cu hopi dedicacion y disciplina. E ta domina diferente instrumento musical, manera piano, baho, cuarta, guitara y tambu.

Ademas, e ta forma parti di varios grupo y organizacion cultural, entre nan Tipico Colegio Arubano, Assemble Band di Scol di Musica Rufo Wever, Tipico Tradicion Musical San Nicolas, Pierewietje y e grupo di baile Youth in Action. Stephanie tambe ta diseña su mes su trahenan y por conta semper cu apoyo di su mayornan.

E ta conoci pa su participacion den diferente festival di canto y presentacionnan pa publico local y turista, y na mes momento e ta un bon studiante den klas cinco di VWO.

   Un otro premio di estimulo den categoria Hubenil ta bay pa Dyon Courtar. Dyon, un hoben cu Autism Spectrum Disorder, ta participa cu hopi entusiasmo den tur careda organisa cu sosten di Patrishi Sports. E ta disfruta enormemente di cada competencia y ta un ehempel di perseverancia y alegria. Dyon ta miembro di e organisacion Beyond Sports Limit y cu apoyo continuo di su famia, el a logra sigui desaroya su talento y confianza. Actualmente e ta bishita Scol Inclusion.

   Den categoria Pre-Hubenil, e prome premio di estimulo ta bay pa Angelly Laclé, kende ta practica gymnastics cu e club Perla Gymnastics. Angelly, cu apenas ocho aña di edad, ta preparandose actualmente pa su prome competencia internacional na Colombia. Cu disciplina y dedicacion, e sa combina su gran pasion pa gymnastics ritmico cu su estudio, y ademas e ta forma parti di e grupo di baile Pierewietje. Su esfuerzo y compromiso a haci cu e destaca como un inspiracion pa otro muchanan.

   Un otro premio di estimulo den categoria Pre-Hubenil ta bay pa e rumannan Z-Nirich y Z-Zirich Gomez. E rumannan morocho, actualmente di nuebe aña, ta dedica nan mes na baseball for di nan tabatin tres aña. Nan ta forma parti di e team White Sharks y a crece huntu cu e team cu hopi dedicacion, perseverancia y amor pa deporte.

    Aunque na cuminsamento e team tabata perde nan weganan, awor nan progreso ta claramente visible, y Z-Nirich y Z-Zirich ta hunga un rol importante den e desaroyo aki, motivando y empuha otro compañeronan pa sigui crece. Nan tin un union masha special riba veld, y inclusive fanaticonan ta yama nan Xander y Jair Bogaerts pa nan estilo di hunga, nan pasion y e forma con nan ta complementa otro.

   Hunto cu nan team, nan a participa den torneonan na Corsou, Bonaire, Punta Cana y den augustus 2025 nan a bay hunga den e World Series na Ocala, unda nan a bira campeon den categoria U8. Z-Nirich a destaca como un hungador masha valioso den diferente torneo y ya tin un Golden Glove, mientras cu Z-Zirich tambe ta reconoci como un di e mihor hungadornan. Den pasado, nan a ricibi tambe un reconocemento di parti di minister di deporte.

   E ganadornan di e premionan di estimulo lo ricibi nan reconocemento riba Dialuna 27 di April 2026, Dia di Rey, for di man di Gobernador di Aruba.