Directora di DRH, señora Omaira Lares:
ORANJESTAD (AAN): Digitalisacion ta parti di e proyectonan di innovacion pa drecha e aparato publico. Segun señora Omaira Lares, Directora di DRH, mester optimalisa procesonan den e aparato publico y mara esakinan na e procesonan di automatisacion y innovacion. Segun e, no por automatisa y toch keda uza stempel, manda carta rond etc. El a infatisa cu ta miho pa introduci un sistema digital pa manda informacionnan rond.
El a agrega cu su departamento, DRH, ta digital solamente interno. Documentonan cu ta bay otro departamentonan, Gobernador of Gobierno, nan mester wordo gebook of gestempel. Esaki lo ta mas facil si hacie digital. Segun e, pronto lo cuminsa cu e proyecto pa digitalisa completo pa asina por traha na un manera mas efectivo, innovativo, sigur y automatisa.
“Tin hopi trabao pa haci aunke cu actualmente DRH ta trahado hopi miho compara cu algun aña atras. Sinembargo tin hopi mas caminda pa drecha. Automatisacion y digitalisacion di aparato publico ta necesario pa trabao y resultadonan mas efecto”, señora Lares a expresa.
