Entrega di certificado di prome fase na e 20 muchanan homber di SVT

Captain Kelly, hopi orguyoso: -  ORANJESTAD (AAN) – Na Mariniers Kazerne, a haci entrega di certificado, na e grupo di 20 hobennan cursista,

cu a pasa e prome fase di Formacion Social (SVT) dia 24 di Juni 2021.

Parti di e ceremonia tabata un video di e trabaonan cu nan a haci un anochi so, cu a wordo presenta, pa e famianan por a mira y sinti orguyoso con duro e hobennan aki a traha. E video a mustra loke ta un anochi so pa e hobennan aki, pero e ta refleha loke tur dia y anochi nan ta haci y keda cu hopi cansancio, loke no ta kita afo cu nan no por sigui.

Captain Kelly, ken a hiba palabra den nomber di Arumil, a expresa esaki. El a subraya cu den e trayecto aki nan ta haya norma y balornan, disciplina, horario manera nan ta cana cu holoshi, manera di papia cu hende, y tur otro tips y tools, cu danki na e team di SVT, cu sin nan e opleiding aki lo no a yega su meta den e prome fase.

Kelly a menciona cu awor nan ta bay pa e fase di stagiaire cu ta e di dos etapa. Tur e tips y tools cu nan a haya durante e prome fase ta pa nan uza durante e di dos fase, cu ta e caminda unda nan ta haya e reto pasobra ta keda na cada un di muchanan homber aki, como persona. Captain Kelly a pidi nan famia pa keda duna tips y tools na e hobennan aki, y esey Arumil tambe lo haci.

E siman aki e hobennan a pone den practica tur loke nan a siña durante e prome 16 simannan. Esaki tabata un trayecto pisa, comosifuera cu e dia no kier a caba, y na dado momento a pone nan duda si esaki nan kier, pero despues a sinti cu esey no ta e limite; cu e ta manera un muraya cu nan tin cu bula over, sigui bay. “Pa cada cos cu bo siña akinan, tin un manera pa pasa e challenge aki”, Captain Kelly a expresa.

Un di e hobennan cu ya a logra di caba SVT lo haya un lugar pa bira militar di Arumil tambe.  E lo ta bayendo Corsow na Augustus, hunto cu otro candidatonan. Tin 20 hoben cu ta bayendo Corsow, y esnan cu caba scol tin e competencia pa logra esaki tambe, captain Kelly a splica. Esaki ta pa bira militar, pero tin otro escogencianan cu ta keda na e persona mes pa haci.

Kelly a subraya cu si Arumil ta orguyoso di tur e hobennan aki, nan famianan tambe mester ta mas orguyoso ainda.

Captain Kelly a gradici Sargento Thiel, Jessica, y henter e team di SVT, cu a haci un tremendo trabao, y danki na nan por a pasa over di challenge ora cu durante e pandemia nan a dicidi di sigui cu e opleiding.