ORANJESTAD (AAN): Diasabra 3 di juli 2021 Santo Eucaristia ta cuminsa pa 7’or di mainta.
Prome cu Santo Eucarestia ta resa Santo Rosario pa 6.15 “Misterio Gososo”, despues ta sigui cu Salve Regina.
Ta invita tur fielnan pa asisti diasabra trempan pa gosa di e salida di solo, pa gradici Dios pa e dia cu ta nos dilanti. Diasabra ta fiesta di San Tomas, apostel cu no a kere cu Hesus a resucita. Pesey a yame: Tomas e Incredulo, como cu Tomas no kier a kere cu Hesus a resusita. Hasta e a bisa: “Si mi no mira marca di e clabonan den pols y si mi no hinca mi dede den e heridanan ey y mi man den Su custia, mi no ta kere!”.
Hopi biaha nos tambe no ta kere, nos mester mira prome. Hesus a bisa Tomas, “Bienaventurado ta esnan cu no a mira pero a kere. Tur fielnan di Mama Maria ta bin resa e Santo Rosario pa bienestar di henter comunidad di Aruba. Casi tur dia nos Papa Francisco ta haci un suplica pa resa e Santo Rosario den e tempo aki cu malesanan ta invadi nos. Humanidad ta bira mas conciente cu nos mester di oracion.
Laga nos resa pa tur nurse cu ta traha den hogarnan y den casnan di Sosiego, den hospital, tur nurse y dokternan ta haci nan empeña pa salba bida di pacientnan. Nan ta mira e ansha y sufrimento y tristesa di e muribundo. Pa tur cu no a bay tuma e vacuna, pa nan realisa cu ta pa nan mes bon y den nan famia. Ban haci un curashi diasabra mainta trempan pa ofrece nos ora y asisti na Santa Eucaristia y resa pa tur esnan cu ta leu di iglesia.
Laga nos ta resa pa necesidad di Iglesia Universal, pa Papa Francisco, Obispo Luis Secco, tur sacerdote, Diacono y laiconan. Pa nos Gobernantenan y tur cu ta carga responsabilidad pa nos pais Aruba. Pa enfermonan den exterior cu a bay busca nan salud. Pronto lo ta na Aruba y gosa di un bon salud.
