Entrante awe mes por cuminsa traha cita pa haci test di oido gratis

Quota Club contento di anuncia nan siman di concientisacion

ORANJESTAD (AAN):  Stella Monsanto, Service Director 2023-2024 di Quota Club International Aruba a duna di conoce den conferencia di prensa diamars atardi, durante e anuncio di 'Siman di Concientisacion pa Cuido di Oido' cu manera tur aña, den luna di september, Quota Club ta dedica su campaña na concientisacion pa cuido di oido.

            El a indica cu Quota Club ta cuminsa e campaña aki cu e impresion di bannernan nobo, cual ta bay uza e aña aki. Ta bay inicia awe diaranson 6 di september te cu 15 di September dunando comunidad e oportunidad pa yama cualkier di e localidadnan cu lo ta haciendo test di oido den forma gratuito: SVb San Nicolas, FEPOH, The Specialists y Aruba Hearing Institute.          

            Ta hopi importante pa traha un cita. E cita ta gratis, a enfatisa. Quota Club ta sumamente agradecido na e 4 localidad pa nan cooperacion durante varios aña caba. Algun di nan a elabora riba nan participacion.

            Cherryldine Buckley, di SVb a duna di conoce cu nan lo tin dos persona na SVb San Nicolas cu lo ta haciendo test di oido durante e  'Siman di Concientisacion pa Cuido di Oido'. Esaki ta nifica cu e biaha aki, esnan cu ta biba pariba di brug lo tin e oportunidad pa check nan oido den nan mesun distrito, a bisa.

            Representantenan di The Specialists, Manon de Vries (audicien) y Iris de Vries (Marketing Manager) a indica cu tur hende na Aruba ta bon bini pa haci un cita cerca nan pa haci un test di oido.

            Kristel van Ness, Manager y Logopedista na FEPOH a gradici e damanan di Quota pa un bes mas pa e 'Siman di Concientisacion pa Cuido di Oido'.

            El a enfatisa cu oido ta un parti valioso di e curpa cu ta duna tur hende accesibilidad na comunicacion, cual ta esencial pa por ricibi mensahe y por comunica.

            E ta keda enfoca riba e importancia di e siman aki pasobra si ta perde oido ta perde un parti esencial di bida.

            Estudionan cu ta wordo haci por constata cu hendenan cu tin un problema di oido y cu no ta haci algo cu esaki. No ta test nan oido of ta sigui biba cu e problema tin chens di haya cierto malesanan manera Alzheimer. "E ta un link directo entre e perdida di oido bo salud", a bisa. Tambe por menciona e parti di salud mental y social, cual ta cay afo den caso di perde audicion.

            Olga Versteeg, Akoepedist na FEPOH a agrega cu tambe por yama FEPOH pa haci un cita. E test ta tuma rond di 20 minuut y ta bon pa esnan cu nunca a haci un test pa probecha e oportunidad aki y haci un chekeo di nan oido.

            Meda Cabenda, directora y Akoepedist na Aruba Hearing Institute tambe a haci un invitacion pa yama y haci un afspraak. El a haci cu ta un honor pa e aña aki un biaha mas por ta presente den e campaña aki. E tin 20 aña trahando cu personanan cu perdida di audicion.

            Pa casi 15 aña, nan ta cooperando cu Quota Club pa haci e testnan na e institute y nan ta mira e bon trabao cu Quota ta haci pa e pueblo di Aruba, a expresa.

            Tene cuenta cu entrante awe, diaranson 6 di September te cu 15 di September por yama e localidadnan aki pa haci un cita gratis. Por bishita e facebook page di Quota Club pa mas informacion tocante numbernan di telefon di cada localidad disponibel pa test di oido.