Entradanan di AZV a cuminza recupera bek caba durante 2021

Aunke ta preocupa cu e nivel di embehecimento...

ORANJESTAD (AAN): Diahuebs mainta, ing. Edwin Jacobs kende ta director di AZV, a bisa cu Organo Ehecutivo di AZV (OE AZV) a ofrece cifranan di aña 2021, pa asina pueblo por sa con e desaroyo aki ta tumando lugar.

   Siman pasa e relato anual a wordo entrega na Ministro di Salud Publico cu ta contene e cuenta anual mas un relato di desaroyo di cuidonan cu a wordo cumpra aña pasa pa e aseguro di gasto medico.

   E cantidad di asegurado den 2021 a reduci levemente compara cu 2020.  Ora di check e porcentahe di aseguradonan riba 65 aña, ta nota cu na aña 2011, apenas 10,7% di aseguradonan tabata riba 65 aña di edad.  Aña pasa na 2021 esaki ta na 16.9%, pues casi 17 porciento di riba nos aseguradonan ta riba 65 aña.

   “Asina aki e lo bay keda crece bay te ora cu den añanan di 2030 lo yega na alrededor di 25% pa 30% riba 65 aña, 35% pa 40% riba 60 aña.

   Si tira un bista riba loke ta e gastonan di aña pasa, si compara esaki, por mira cu tin un bahada leve den e gastonan di AZV na 2021, y un parti ta debi tambe na e recorte cu a wordo haci den cuadro di e plan di Five-Wave Model.  A cera e aña cu un rebaho hopi minimo mes den e gastonan di AZV.

   Ora di check e gastonan promedio di cuido pa asegurado, por a nota con e ta evoluciona di 3.463 Florin na 2012, pa yega na aña pasa na 4.125 Florin promedio pa cada asegurado di e 100 pico mil cu tin den sistema di AZV.

   “E tendencia aki ta uno cu ta bay sigui den futuro, unda e gasto promedio di cuido pa cada asegurado ta bay keda aumenta den futuro,” ing. Jacobs a bisa.

   Encuanto entradanan di AZV, e Director a bisa cu na 2019 e tabata un tremendo aña pa nan, caminda cu e Fondo a haya 263.6 miyon Florin na entrada di prima.  Pero debi na pandemia di Covid-19, na 2020 el a baha te na 222.6 miyon, sinembargo na 2021 ya caba el a bay bek na un bon recuperacion y e entrada di prima ta subiendo bek.  Na 2021 el a trece 243.4 miyon Florin.

   Placa cu a drenta via e Impuesto asigna na BAZV, cu ta un componente tambe hopi importante di entrada pa AZV cubri su gastonan.  Por mira un crecimento hopi mas cerca compara cu e prima.

   For di 2020 pa 2021, como 40 miyon Florin a drenta extra.  Na 2019 e tabata na 215.3 miyon Florin, pero durante pandemia na 2020 el a baha te na 144.6 miyon.  E cifranan nobo di 2021 ta mustra cu el a bay bek caba te na 186.9 miyon Florin.

   BAZV ta keda como un fuente hopi importante pa nos, y segun Director Jacobs, ainda nan ta pensa cu lo por haya mucho mas di esaki, y pesey dos siman pasa nan a start un campaña.  AZV ta convenci cu e no ta hayando su fair-share di BAZV cu ta kedando otro caminda.  Pesey na ta pidi pa ora bo cumpra algo, pa exigi e comerciante pa bo haya bo recibo.

   Esey ta garantiza cu e placa di BBO y BAZV ta bay pa e meta cu el a wordo stipula pe.