*Otro siman lo delibera cu Secretario di Estado van Huffelen
ORANJESTAD (AAN): Diahuebs 19 di mei, Minister President Evelyn Wever-Croes a reacciona riba e anuncio di sindicatonan pa tene accion otro siman.
“Mi kier sigura boso cu nos Gobierno ta haciendo nos maximo esfuerso pa stop e recorte den di dos mita di e aña aki, manera nos a bisa semper. Nos meta ta pa entrante juli stop e recorte mensual di 5%, y pa otro aña, aña 2023, stop e recorte di 12.6% completamente.
Esey kiermen cu entrante juli e aña aki, e empleado publico por bay haya su salario completo bek, y entrante otro aña e por haya su vakantie uitkering tambe.
Y sin cu mester troca esaki pa dianan liber. Nos meta ta pa paga e 5% aki cash den man di e empleado publico.
A inclui e sumanan aki caba den nos presupuesto di 2022 y 2023, y nos ta den negociacion cu Hulanda riba esaki. Ta combersacionnan dificil, pero mester bisa cu tin apertura di parti di Hulanda.
Si nos logra yega na un acuerdo, y Conseho di Minister di Reino aproba esaki, na juli 2022 caba nos por cuminsa paga tur empleado publico y semi-publico 100% di nan salario.
Nos ta consciente di e dolor cu e recorte aki ta causando, especialmente debi na e aumento drastico di prijs debi na e guera na Ukraine. P’esey, si nos como politiconan mester sigui corta e 25%, lag’e ta asina, basta cu nos por paga empleadonan salario completo.
Otro siman cu Secretario di Estado Alexandra van Huffelen ta na Aruba, nos lo sigui delibera riba e topico aki, y ohala nos por sali afor lihe. Mi ta compronde cu sindicatonan ta preocupa y kier manifesta nan malcontento, y p’esey mi kier sigura sindicatonan cu nos ta haciendo tur lo posibel pa logra elimina e recorte entrante juli di e aña aki”, tabata declaracion di Minister President Evelyn Wever-Croes, como reaccion riba e accionnan cu sindicatonan a anuncia pa otro siman.
