Josephine Albertus: --- ORANJESTAD (AAN): Simar Diahuebs mainta durante un conferencia di prensa na IPA, a reacciona riba e resultadonan di e conferencia ‘Enseñanza Nos Responsabilidad’.
Presidente di e sindicato Josephine Albertus a bisa cu tabata un honor pa Simar pa participa na un conferencia hunto cu G297 y IPA.
“Pa nos e ta semper hopi importante pa concientiza e pueblo completo y pa tambe haya informacion”.
Como sindicato bo ta vocifera loke e pueblo tin como preocupacion of disgusto.
Nos por bisa cu riba 10 di Mei nos por a duna informacion riba e retonan cu tin den veld di enseñanza y tambe e perspectivanan cu esaki lo trece cune, segun Albertus.
El a sigui bisa cu Simar a duna un bista di loke ta pasando, incluyendo a papia di e hecho cu tin docentenan cu no ta sinti nan mes comodo.
“Hopi biaha ora cu nos papia cu diferente instancia of stakeholder, e no ta asina bisto y comprendibel pa tur hende, den ki reto tur esnan cu ta laborando den veld di enseñanza ta pasa”.
E ora ey e tabata un oportunidad unda cu nos por a duna informacion y nos a haya hopi bon tambe cu e tabata un lectura interactive, unda cu esnan presente y na cas por a haci pregunta y e ora ey tambe duna nan ponencianan, segun presidente di Simar.
El a indica cu tabata hopi bon cu banda di duna informacion, asina Simar tambe a ricibi informacion.
Segun Albertus, den e mesun sala unda cu Simar a sinta tabata tin Departamento di Enseñanza, unda cu e director a splica ki perspectivanan nan ta bezig cune caba y cua innovacionnan ya caba ta andando.
“Loke a sali afo tambe ta cu hopi biaha bo no sa ki innovacionnan tin”.
A sali sigur critica constructivo, unda cu a indica na Directie Onderwijs cu nan tin cu corda pa duna informacion y tambe pa nan cambia nan website na un manera mas atractivo, pa e veld y comunidad bay y busca informacion.
