Enseñansa pa Empleo completamente nobo lo habri na November

ORANJESTAD (AAN): Minister di Labor Glenbert Croes, encarga cu Enseñansa Pa Empleo (EPE), a anuncia cu e apertura oficial di EPE, lo ta November venidero.

E luga a worde completamente renoba. Nan a ricibi computernan nobo y a crea un logo completamente nobo cu ta representa e EPE nobo.

   Minister Croes a remarca cu e ta sumamente agradeci na e apoyo grandi cu EPE a bin ta ricibiendo di e stakeholdersnan, specialmente di AHATA y p'esey como Minister encarga, e ta uni su mes na EPE pa gradici AHATA, pa tur e materialnan, cu nan a pone na disponibilidad di EPE pa e cursonan bartender.

   Mirando e desaroyo economico di pais Aruba y e crecemento grandi den turismo, e ta importante pa nos ciudadanonan local tin e posibilidad di prepara nan mes efectivamente pa subi e mercado laboral. "Mi ta contento cu nos ta poniendo, cu e apertura di un EPE completamente nobo, un fundeshi di existencia pa largo termino" e mandatario a expresa.

   Tambe, Minister Croes a informa, cu mirando tur e apoyo y sosten cu EPE Oranjestad ta hayando di e stakeholdersnan, Gobierno di Aruba ta compromote su mes pa habri un EPE na San Nicolas. Esaki lo duna e ciudadanonan di San Nicolas e oportunidad pa tambe por sigui cursonan cu lo haci e distancia pa nos mercado laboral mas cortico. Tin hopi proyecto andando actualmente na San Nicolas, y pone un EPE cu cursonan disponibel pa e ciudadanonan di pariba, lo ta sumamente beneficioso.

   "Mi kier gradici, e team completo di EPE, lidera pa Sabine De Groot, pa nan esfuerso, empeño y compromiso den duna EPE su derecho di existencia. Di mi banda, mi kier sigura boso, cu den mi, boso tin un minister cu ta kere y ta sostene EPE completamente" Minister Croes a expresa.