Pregunta a bira si gobernantenan Hulandes ta confia CAFt
*Cuanto placa supervision di Reino lo a costa e Arubiano?
*Den Haag ta crea problema pa Aruba den turbulencia mundial
ORANJESTAD (AAN) — “Loke ta pasa e momentonan aki na Aruba ta bay contra e esencia di e relacionnan den Reino describi den Statuut. Gobierno Rutte, den porta di eleccion na Hulanda, a crea un argumento pa oposicion bay contra Gobierno di Aruba, cu no ta acepta Hulanda exigi poder di supervision na Aruba contra regla hancra den Statuut.”
E desaroyonan riba tereno di relacionnan den Reino Hulandes, ta haya hopi atencion di parti di expertonan na Aruba, cu ta acusa Gobierno Hulandes saliente di Mark Rutte, cu directamente ta crea un ambiente politico na Aruba, cu ta bay completamente contra base di Statuut.
Informantenan di DIARIO cu preocupacion creciente, ta tuma nota di e forma con e decision di Gobierno Rutte pa nenga Aruba un prestamo cu un interes abou, ta wordo uza como un arma politico na Aruba na vispera di 2024 cu lo conoce e antesala pa eleccionnan 2025.
“Loke ta pasa na Aruba ta sumamente peligroso pasobra si e practica di Hulanda bira aceptabel, politiconan Hulandes por pusha politiconan Arubano contra muraya pasobra nan no ta sigui loke e politiconan Hulandes contra regla, ta demanda,”expertonan ta indica.
Inaceptabel pa expertonan ta e hecho cu e instancia oficial di Reino, CAFt, cu ya ta supervisa e gobernacion financiero di Aruba, tin un bon cooperacion cu gobernantenan di Aruba, cu ya a logra e meta mayor di bon gobernacion cu ta percura pa Aruba tin mas entrada cu e tin gasto.
Politiconan Hulandes ta bon na haltura cu e forma cu nan ta presenta e rechazo di Gobierno Evelyn Wever-Croes pa entrega autonomia financiero di Aruba na Hulanda, no ta cuadra cu stipulacionnan den Statuut.
“E areglo di Statuut ta basa riba un relacion di respet, cu ta bay perdi na un forma total den e desaroyonan actual,” informantenan ta indica.
Nan a mustra cu no por ta cu e CAFt ta satisfecho cu e trabou gubernamental na Aruba, cu Hulanda ta insisti riba medida di supervision, cu lo tin efecto politico directo riba Gobierno actual, manera ta mas cu visibel actualmente na Aruba.
Gobierno Hulandes ta bon na haltura di e impacto politico directo cu su posicion enfrente Gobierno Wever-Croes tin riba politica local y cu no ta permisibel si sigui contenido di Statuut.
Mientras informantenan ta indica cu Aruba na e momentonan aki mester ta un solo voz pa confronta un menasa serio den e forma cu Den Haag ta interferi den politica local di Aruba sin hustificacion, e pregunta grandi cu ta bini dilanti ta, ki balor Gobierno di Reino ta duna CAFt, cu ta traha cu un bon entendimento y bon resultado cu Gobierno di Aruba, cu a percura pa un mehoransa enorme di e situacion financiero di Aruba.
E pregunta grandi cu Aruba mester haci su mes ta awor, con e peso financiero di medida lo tabata pa Pueblo di Aruba, si a laga completamente na Gobierno di Mark Rutte cu a permiti e origen di e crisis financiero di Aruba, pa dicidi.
“No ta Hulanda a exigi medida y mas medida pa asina Aruba bandona e desaster financiero cu Gobierno Rutte a permiti tuma lugar?” a bini dilanti.
Gobierno Wever-Croes mester a tuma cantidad di medidanan pisa riba tereno financiero a base di e palabracion cu e tin cu Reino, cu awor ta deshaci di e logronan di Gobierno di Aruba den cooperacion cu CAFT, y ta entrega argumento pa weganan politico tuma lugar na Aruba.
E situacion actual na Aruba ta causa preocupacion serio debi na e hecho cu e ta duna prueba cu e Gobierno Rutte kier mete directamente den resultadonan politico na Aruba, cu ta completamente contra e alma di Statuut.
Gobierno Rutte ta mete directamente den e situacion politico na Aruba, despues cu e tin prueba con Gobierno Wever-Croes a sigui e camindanan describi pa Reino pa logra recuperacion di Aruba.
Sigur na momento di problema serio mundial, cu ta rekeri maximo cooperacion den Reino, e actitud di Gobierno Mark Rutte, ta mishi cu e esencia di autonomia di Aruba.
Informantenan experto ta conclui cu Gobierno di Reino ta crea e impresion cu e no ta confia e resultadonan di asistencia di CAFt na Aruba.
