Encuesta despues di debate a proclama Evelyn Wever-Croes como Lider!

Debate a bira victoria abrumador pa Wever-Croes como dirigente di Aruba - *41 porciento ta mira Evelyn como e miho lider pa dirigi pais Aruba - *Pa 38.0 porciento di participante di encuesta lider di MEP a gana debate

ORANJESTAD(AAN)—Ayera Camara di comercio di Aruba a presenta resultadonan di su encuesta despues di e prome anochi di debate, riba su pagina di Facebook.

E resultadonan ta indica directamente cu e actual Prome Ministro di Aruba, mr. Evelyn Wever-Croes, a score como lider y ta wordo considera dor di 41 porciento di participantenan na e encuesta, como e persona mas indica pa dirigi Aruba.

Lectornan mes por tuma nota di e resultadonan cu ta indica cu e gran mayoria di Arubiano (78.2 porciento) ya a dicidi pa kende e ta bay vota.

7.5 porciento a bisa cu nan no a tuma un decision y 14.2 porciento ainda ta duda kico nan mester haci na urna electoral.

Cual lider politico a gana e prome debate, segun 38.0 porciento di e participantenan na e encuesta tabata e lider di MEP, mr. Evelyn Wever-Croes; sigui pa Accion 21 cu 22 porciento, AVP cu 13.0 porciento y MAS cu 9 porciento.

Naturalmente e pregunta importante ta, kende ta e persona mas adecua pa dirigi e pais Aruba. Den esaki e participantenan na e encuesta no a laga duda atras. 41 porciento di e participantenan na e encuesta ta di opinion cu e lider di MEP, mr. Evelyn Wever-Croes mester ta e persona cu ta dirigi Aruba y asina mester ta lider di Aruba.

Na segunda luga a bini cu 16 porciento, e lider di Accion 21, sigui pa e lider di AVP cu 15 porciento,  MAS cu 10 porciento y Raiz cu 6 porciento.

37 porciento di e  participantenan na e encuesta ta considera e lider di HTC como e persona menos prepara na e debate. 18 porciento a haya cu Mike Eman tabata e lider di partido menos prepara.

E debate a cambia punto di bista di votadonan? Segun 68.15 porciento di e participantenan e debate no a afecta nan pensamento, mientras cu 23.98 porciento a bisa cu si e debate a cambia nan pensamento mientras cu 7.87 porciento di e participantenan na e encuesta a bisa cu nan no sa.

Den e resumen cu a wordo presenta na publico riba Facebook, Camara di Comercio a mustra cu manera a wordo anuncia durante e prome debate dia 3 di juni ultimo, e encuesta general a keda habri den un forma di ‘encuesta despues di debate’ te cu dialuna 7 di juni 12or di merdia.

Asina a duna e posibilidad na e personanan cu no a logra di vota e mesun anochi y pa ricibi mas feedback di comunidad despues di e prome edicion di debate 2021.

Riba e plataforma interactivo di Setar, cu a estrena durante debate 2021 a ricibi un cantidad di mas cu 7000 participante (usuario di e plataforma), unda cu e usuario por a haya acceso sea door di scan e QR code of via e link https://debate.kvk.aw.

E plataforma a enfoca riba un intercambio cu televidentenan ‘Live’ na cas, unda participantenan activo riba e plataforma por a sigi e secuencia di e debate y asina nabega di un tanda pa e siguiente tanda contestando varios pregunta den un periodo di tempo asigna.

E resultado final di e plataforma ta basa riba e participantenan cu tabata activo y cu a duna nan contesta riba e encuesta di 5 pregunta despues di tanda 3.

Mas o menos mitar di e cantidad di usario di e plataforma a vota/contesta e preguntanan 1 te cu 5 di e encuesta despues di tanda 3.

Manera Camara di Comercio a trece dilanti riba FB, pa e siguiente debate lo laga e plataforma aki habri durante henter e debate, pa facilita tur hende pa vota na momento cu nan ta desea.

E resultado final di e encuesta di 5 pregunta despues di tanda 3 ta ilustra den e imagenan cu Camara di Comercio di Aruba a publica riba su Facebook y awe nos kier reproduci.