Sin bista riba futuro pero den “Nomber di Dios” el a cera portanan di economia - *Awe un Aruba cu speransa a reuni na costa pa bolbe saluda barco di turista y - *Ora desesperacion a bati na porta, Evelyn Wever-Croes a crea un futuro nobo
ORANJESTAD(AAN)—“Con ta bay splica Aruba cu e pais ta keda sin economia?” Esaki tabata e pregunta principal di DIARIO for di momento cu a bira evidente cu Covid-19 ta bay basha e base mundial existente abou.
Como matutino di Aruba, DIARIO tur dia mester a atende cu ciudadanonan cu tabata puntra nan mes kico lo pasa cu nan futuro pero tambe cu nan bida.
Awe cu Aruba a mira su prome barco di turista drenta haf, pa DIARIO e costa di Aruba tabata tin un nificacion importante. E costa tabata marca e porta cu a wordo cera pa economia y asina tambe pa entrada di Miles di Arubiano, cu no tabata sa kico ta spera nan pero tambe tabata tin miedo di muri.
Continuamente DIARIO mester a atende cu Arubianonan, cu for di momento cu e pandemia a presenta su mes na mundo, tabata realisa cu nan bida tambe tabata core peligro.
E gran mayoria di Aruba tabata depende di turismo na Maarr 2020, ora trahadonan mes tabata puntra DIARIO kico nan riesgo como hende cu ta traha cu turista tabata, den e malesa cu tabata avansa.
Segun cifra mundial tabata subi na Februari, continuamente DIARIO mester a informa Pueblo di e peligro pa bida di hende sigur na un pais cu ta depende di su contactonan cu otro pais manera Aruba.
Na Maart 2020 Prome Ministro Evelyn Wever-Croes a tuma e decision mas grandi cu historia di Aruba conoce, ora como Presidente di e Conseho di Ministro, el a enfrenta Pueblo y bisa cu portanan di Aruba a wordo cera.
Aruba a keda sin un economia, sin un entrada pa famianan, sin un entrada pa empresanan. Hotelnan a cera nan porta y nan cuminda den freezer tabata papia di un futuro, completamente insigur.
DIARIO conoce e desesperacion di Aruba na Maart 2020. Pueblo a haya su mes meymey di e dolor di mester scoge pa su bida of pa su pan, cu a bira asunto di Gobierno Wever-Croes cu asina tambe a bay contra tur regla di democracia, cu ta exigi pa cada ciudadano tin responsabilidad pa nan mes y pa nan pais.
No por a laga e Arubiano sin pan y sin entrada. Gobierno Wever-Croes mester a crea formanan pa yuda tur hende sigui dilanti.
E maneho di Evelyn Wever-Croes pa no abusa di placa di Aruba pero pa tuma medida pa asina Aruba por confronta futuro, a duna resultado cu Aruba en espera di Hulanda, por a sigui corto tempo dilanti y negocia cu Hulanda.
Na mes momento Aruba mester a tuma medidanan pa ekipa e pais contra e malesa desconoci pa mundo.
Den e situacion aki, Aruba a sigui cana na man di Prome Ministro Evelyn Wever-Croes nu no tabata tin un tempo facil pa atende cu Hulanda.
E cualidad di Prome Ministro Wever-Croes a bini dilanti, ora den e situacion deplorabel cu Aruba tabata, el a logra haci un prestamo pa asina Aruba por a sigui negocia cu Hulanda y asina porfin Hulanda a dicidi di duna Aruba asistencia.
Awe Aruba ta ricibi su prome barco di turista. Algo grandi a sosode.
Na futuro awe Aruba ta entrega e mensahe, cu Aruba atrobe a registra un logro enorme. E desesperacion di 2020 awe a bira speransa pa un futuro cu ta wordo construi na un pais, caminda Gobierno Wever-Croes den pleno pandemia a percura pa Aruba por a sigui traha, sigui come y sigui hasta traha plan pa futuro.
E prome barco di turista a presenta na costa di Aruba, cu ta reconstrui su base pa crea un futuro nobo “Den Nomber di Dios” manera e dirigente mas grandi cu Aruba a conoce for di Betico Croes ta guia pueblo pa futuro.
