Mester uni acuerdo cu Nicolas Maduro na rapport Refineria di Aruba - *E motibo di secrecia ilegal enfrente Parlamento mester wordo studia
ORANJESTAD(AAN)—E investigacionnan di DIARIO entorno e proyecto Citgo a drenta un fase nobo.
E informacionnan cu DIARIO a publica ayera, ta sostene uno di e investigacionnan periodistico mas pisa di DIARIO, cu na 2018 a habri caminda pa Aruba por a actua na interes di Aruba den e caso di Citgo.
Ora Gobierno Mike Eman a uza e entusiasmo di Pueblo di Aruba cu lo habri e refineria di Lago, Gobierno Mike Eman no a sigui e caminda legal cu leynan tabata exigi.
A base di e rapport di Raad van Advies cu a mustra Gobierno Mike Eman cu e legalidad di e proyecto ta un pregunta grandi, DIARIO a mustra Aruba cu realmente e proyecto tabata ilegal pasobra a introduci e proyecto na forma ilegal.
Awor cu informacionnan nobo ta drenta cu ta splica con e interes di Aruba a wordo kibra dor di Gobierno Mike Eman na un forma directo mientras Gobierno ta hura cu e ta busca interes di Aruba, leynan di Aruba ta exigi pa e Acuerdo cu Nicolas Maduro, un figura dudoso den politica regional y persigui pa autoridad internacional mescos cu figuranan importante di Citgo, wordo pone hunto cu e rapport forensico cu ta ilustra kico a pasa den Refineria di Aruba.
E rapport aki ta den man di Ministerio Publico, cu segun informantenan lo mester ta e instancia cu ta studia e forma cu Gobierno Eman a firma e Acuerdo di Citgo sin tratamento ni permiso di Parlamento di Aruba, pues contra ley.
Ademas di esaki, Gobierno Eman a percura pa e documentonan no por a wordo studia door di Miembronan di Parlamento cu no tabata di fraccion di AVP, cu asina a kibra ley cu ta exigi pa Miembronan di Parlamento tuma decisionnan a base di estudio profundo di un materia.
Un capitulo nobo ta habri den e asunto di Citgo cu mester ta parti di un investigacion total di loke a pasa cu refineria di Aruba na man di Gobierno Mike Eman, cu sigur a kibra e Ley di Contabilidad dor di firma un acuerdo cu ta contra interes di Aruba, sin aprobacion di Parlamento.
“Aki por papia di un traicion di e interes di Aruba,” informantenan a indica.
