Encuesta a demostra cu poblacion di Aruba ta preocupa cu prijsnan halto

Consumidor hopi pesismista den di dos trimester

ORANJESTAD (AAN): Riba Diabierna, Banco Central di Aruba a emiti resultado di encuesta haci di ‘Confidence Survey’ pa e di dos trimester di 2023.

   Consumidor tabata mas pesimista, mirando cu e indice di confianza di consumidor a cay cu 0,4 punto di índice te na 92,6 den e di segundo trimester di 2023 (Grafico 1).

   Na final di e di segundo trimester, consumidor tabata principalmente preocupa cu:

(1) E situacion di negoshinan y di economia lo deteriora (Q2-2023: 61 porciento, Q1-2023: 51 porciento).

(2) Tin dificultad pa haya un trabao nobo (Q2-2023:51 porciento, Q1-2023: 44 porciento).

(3) E posicion financiero di gobierno lo empeora (Q2-2023: 44 porciento, Q1-2023: 43 porciento).

   Ademas, 39 porciento di tur respondente ta anticipa cu e situacion financiero di hogar lo empeora den e di segundo trimester di 2023, esta 9 punto di porcentahe mas compara cu e trimester anterior (Q1-2023: 30 porciento). Aproximadamente 93 porciento di tur respondente a señala cu nan ta premira cu prijsnan lo ta mas halto den e proximo 6 lunanan (Q1-2023: 91 porciento).

   Tanto e indice di e situacion actual como e indice di expectativa a cay, esta cu 0,9 punto di indice te na 93,0 y 0,7 punto di índice te na 92,7, respectivamente, den e di segundo trimester di 2023.

   E cantidad di respondente cu a raporta cu tuma un hipoteca no tabata adecua a crece te na 68 porciento (Q1-2023: 65 porciento). Pa locual ta haci un prestamo, 69 porciento di respondente a indica cu esaki no tabata oportuno (Q1-2023: 68 porciento). Mientras e respondente cu a señala cu compra di un auto no tabata conveniente, como tambe compra di un aparato grandi no ta adecua, a keda igual na 73 porciento y 56 porciento, respectivamente. Ademas, 56 porciento di respondente a indica cu baymento cu vakantie no tabata factibel, (Q1-2023: 57 porciento). Consecuentemente, e indice di habito di consumidor a crece marginal di 92,5 den e di promer trimester di 2022 te na 92,6 den e di segundo trimester di 2023.

   Informacion adicional riba e encuesta di confianza di consumidor ta disponibel riba website di CBA, esta cbaruba.org.