KEY BISCAINE: Ora cu den verano ta haci asina hopi calor excesivo, ningun hende no kier bay drenta den un tobo yen di awa cayente. Den cierto partinan di Florida, esey ta loke bo ta sinti si bo drenta lama e dianan aki.
Na comienso di siman pasa, temperatura di superficie di lama a yega hasta 38.4º Celsius na e parti mas zuid di Florida na Manatee Bay. Esaki ta igual na 101.2º Fahrenheit, segun National Weather Service.
“Ta comosifuera no tin diferencia entre humedad di aire y pa bay den lama,” ta loke Chelsea Ward di Fort Myers, Florida, a bisa.
E temperaturanan halto aki di lama ta sorprendiendo hendenan na Florida, unda habitantenan ta costumbra cu calor y hopi pensionado ta haya refugio eynan di winter frieu mas panort. Varios otro parti den e area a yega temperatura di como 35º Celsius. Un tormenta porfin a pasa Diaranson, y esey a yuda temperatura di lama baha bek na mas normal di 29º Celsius (como 80º Fahrenheit).
E ser humano pa naturalesa ta busca awa pa haya chens di refresca curpa. Tur verano ta miyones di hende ta bisti nan zwembroek of bikini pa un dia na beach, y un chens pa fresca curpa den awa di lama, tumando un break asina di trabao y elimina preocupacion. Piscinanan ta ofrece mesun alivio y ta un lugar pa hendenan reuni. Pero ora cu temperaturanan di awa ta bira demasiado halto, un tiki di e atraccion ta bay perdi.
Ora ta calor, e curpa di e ser humano ta fria su mes door di crea sudor, cu ta evapora di bo cuero y asina ta kita calor. Si bo drenta lama normalmente e ta refrescante debi cu calor eficientemente ta transferi for di bo curpa pa e awa. Pero ora cu lama bira mas cayente, e efecto ey ta bira menos y calor no ta bandona bo curpa asina rapido mas, segun Michael Mullins, un toxicologo di Washington University y docter di emergencia na Barnes-Jewish Hospital na St. Louis.
Lama cayente mas bien ta actua net lo contrario, y ta haci bo curpa aun mas cayente! Esey no ta un experiencia placentero riba un dia cu ta demasiado calor caba na Florida. “E lo lagabo sinti,” segun Mullins, “comosifuera bo ta landando den soppi”.
