Martijn Balkenstein, director di KvK:
*Pero sin companianan chikito Aruba lo a perde su forza laboral
ORANJESTAD (AAN) – Manera ta conoci, Director di Camara di Comercio y Industria di Aruba (KvK) Martijn Balkenstein, antes tabata Director di Oficina Central di Estadistica (CBS) y como tal, el a señala, den entrevista cu DIARIO, cu e sa cu 10% di e companianan grandi, ta genera mas of menos 90% di Aruba su GDP, pero na mes momento si e negoshinan chikito lo no ta existi mas, practicamente Aruba ta perde henter su forza laboral, pasobra 97% di e companianan ta mediano y chikito.
Berdad ta e cantidad mas grandi, pero pa genera placa pa e GDP, Aruba no por ta sin e companianan grandi.
El a agrega cu impuesto riba ganashi ta un di e formanan mas importante pa dirigi nos pais, y esey a subi e ultimo añanan.
Finalmente, Balkenstein a señala cu KvK tin un bon relacion cu Minister Geoffrey Wever y nan ta topa basicamente dos biaha pa luna, y KvK trece dilanti nan concern y ideanan, y hopi biaha nan ta wordo bon scucha.
E minister tin e posibilidad di implementa tur e ideanan cu KvK ta vocifera, pero e no ta e unico minister den e constelacion. KvK ta vocifera su ideanan cu tur e stakeholders manera ATIA, AHATA, etc., y conhuntamente nan ta purba di vigila e direccion su mester tuma.
