Encanta idea pa ex-Presidentnan keda reuni cu ATIA

ORANJESTAD (AAN): Manera DIARIO a trece dilanti caba, den cuadro di su di 80 aniversario,

recientemente the Aruba Trade and Industry Association (ATIA) a organisa un lunch pa tur su ex-presidente y ex-directornan.

   Segun e actual president Herrick Henriquez, e ultimo biaha cu un reunion asina a wordo organisa tabata 10 aña pasa pa ATIA su di 70 aniversario. Sr. Henriquez ta conta cu ta un ex-presidente a coment’e cu den pasado ex-Presidentnan tawata reuni cu hunta di directiva di ATIA regularmente.

   Pa e motibo ey, e directiva actual a dicidi na organiza un Almuerzo pa no solamente celebra e 80 aña, pero tambe siña di e historia di ATIA y haya conseho valioso di nos baluartenan cu a lidera ATIA desde decada 70 bin ariba. E informacion valioso lo wordo tuma den consideracion pa yuda crea un vision pa ATIA y futuro di Aruba su economia.

   Mester indica cu e atardi tabata uno hopi ameno unda a comparti hopi storia, idea, comentatio constructivo y aprecio pa e trabou cu ATIA ta eherce pa 80 aña caba cu exito. ATIA a hasi uso di e oportinidad aki pa saca portret di tur e ex-presidente y ex-directornan pa crea un “Hall of Presidents” den nan honor.

   Durante ATIA su aña di celebracion, nan lo saca hopi informacion y video, unda lo culmina cu un celebracion pa comunidad completo riba 13 y 14 di juni y uno oficial riba 18 di juni cu ta e fecha di fundacion di ATIA.